Laing kandidato sa BOPK gipulihan

CEBU, Philippines — Mi-withdraw na sa iyang kandidatora pagka-konsehal sa Cebu City South District ang kapitan sa San Nicolas Proper nga si Clifford Niñal. Ang anak ni Kongresista Rodrigo Abellanosa nga si Jose Abellanosa maoy nihulip kaniya.  Si Niñal maoy ikaduhang kandidato sa Bando Osmeña Pundok Kauswagan nga ni-withdraw sa iyang kandidatora .

Kahinumdoman nga niadtong Biyernes , niatras usab sa iyang kandidatora pagka-kongresista sa south district ang kanhi mayor nga si Tomas Osmeña  ug nihulip kaniya si BG Abellanosa.

Suma pa  ni Kongresista Abellanosa kinsa mao usab ang campaign  manager sa BOPK nga gihuna-huna gyud kini og maayo sa partido.

Matud pa niya nga ma-busy si Niñal sa kampanya  ni Bise Presidente Leni Robredo kinsa nidagan pagka-presidente

Si Niñal sa iyang bahin miingon nga nisanong ra siya sa panawagan sa iyang mga konsituwente sa Brgy. San Nicolas Proper kinsa dili pa andam nga biyaan niya ang iyang barangay. “Dili gyud sila ganahan nga ako sila biyaan, gusto nila nga akong tiwason akong nahibilin nga mga termino isip kapitan,” matud pa niya.

Tungod sa maong panawagan , nakahukom si Niñal nga iprayoridad pag-atiman iyang barangay.

Sa laing bahin,  gipasigarbo sa pangulo sa Partido BARUG nga si Cebu City Acting Mayor Michael Rama nga wala gyud nauso sa ilang grupo ang substitution sa ilang mga kandidato.

Nasayran nga kagahapon ang deadline alang sa maong butang ug wala gyuy nausab sa ilang line-up.  Matud pa ni Rama nga sa wala pa sila niduso sa ilang certificate of candidacy sa miaging buwan, gipaniguro gyud nila ang pulido nga pagpangandam sanglit naglambigit kini og pagpangalagad.

Nakita na usab ang dakong posibilidad nga si Senador Bong Go ang i-endorso sa BARUG sa pagka-presidente.

Hinuon gitataw ni Rama nga mohimo ra sila og opisyal nga anunsyo niini sa umaabot nga mga adlaw sanglit nagpaabot pa sila sa final ang announcement ni Presidente Rodrigo Duterte.

Una na nga gibutyag sa acting mayor nga kun kinsa ang itudlo ni Duterte, mao kini ang iyang suportahan.

Si Atty. Chauncey Boholst, Election Officer sa Commission on Elections(COMELEC) Cebu City North District miingon nga karong napupos nan a ang deadline, makatutok na sila sa pagpinalisar listahan sa tanang kandidato.

“After that i-finalize na gyud ang list of aspirants sa COMELEC Manila for printing na sa ballots,” sigon ni Boholst.

Inig human sa Nobyembre 15 dili na pwede ang withdrawal apan mahimo ang substitution kun mamatay ang kandidato o kaha na-disqualify.— Decemay P. Padilla/IBM (BANATNEWS)