Inspection himoon sa kapolisan sa mga establisamento

CEBU, Philippines — Gitahasan karon ang mga hepe sa police station ubos sa Cebu City Police Office (CCPO) nga makig-alayon sa security officer sa mga malls sa posibleng pagdagsa sa mga tawo nga wala pa mabakunahi nga mag-dine- in.

Matud ni Police Lt. Colonel Wilbert Parilla, Deputy City Director for Operations sa CCPO, ang matag hepe sa police station gitahasan usab nga makig-alayon sa mga barangay kapitan ubos sa ilang hurisdiksyon.

Ang mga police personnel nga gipakatap sa pagmonitor sa minimum health standard protocols sa ilang tagsa-tagsa ka mga barangay, maoy

mobarog isip lider sa ilang BPSO (barangay public safety officer) nga maoy mu-monitor sa mga establisamento.

"Kay karon naa pa man tay daghang deployment pa sa atong mga menteryo so nakuhaan to ang atoang mga personnel sa barangay," segun pa ni Parilla.

Matud ni Parilla nga gimandoan sila sa paghimo og random inspection sa mga establisamento sulod sa mga malls ilabi na karon nga naa nay minors nga gipasulod sa mga malls.

Dugang pa ni Parilla, nga sa pagkakaron, wala pa silay nakit-an nga nakalapas sa maong mga lagda, apan sila sa kapulisan igo ra moduso ug report lakip na ang pag document sa mga mahitabong kalapasan. — Rowena D. Capistrano (BANAT NEWS)