Paggamit sa social media angayan bantayan sa ginikanan

CEBU, Philippines — Nihangyo ang pangu sa kapulisan sa Dakbayan sa Talisay ngadto sa mga ginikanan nga bantayan ang kalihukan sa ilang mga anak.

Kini ilabi na ang pag gamit sa social media nga maoy dako nga makahatag og impluwensya sa kabataan.

Giangkon ni Police Lt. Col. Gerard Ace Pelare nga dako og papel ang social media sa kausaban sa mga tawo ug kabataan karon. Hinungdan nga siya nihangyo sa mga ginikanan nga bisan paman sa pagpanginabuhi dili sab gyud kalimtan kumustahon ang ilang mga anak.

Nanghinaot si Pelare nga wala na untay susama nga panghitabo sa duha ka batan-ong babaye nga milayas sa ilang panimay gumikan sa kahiubos sa ilang tagsa ka pamilya.

Maayo nalang gani kay ilang naabtan ang mga dalagita didto sa lungsod sa Samboan nga nangandam na unta nga mobiyahe paingon sa lalawigan sa Negros.

Ang cellphone sa batan-on ilang gipaubos sa eksaminasyon sa cyber-crime aron masuta kung wala bay lain nga tawo nga nagsulsol sa mga batan-on nga mobiya sa ilang pinuy-anan. (BANAT NEWS)