Covered court sa Tisa II Elem. School palapdan

CEBU, Philippines — Gihimo kagahapon ang ceremonial signing sa memorandum of understanding alang sa pag-pausab ug pagpalapad sa Tisa II Elementary School Covered Court.

Ang mga negosyante nga sila si Chester Cokaliong ug Chase Cokaliong maoy moabagar sa mga gastohanan niini.

Matud pa ni Konsehal Phillip Zafra nga moabot ngadto sa P4 milyones ang magasto sa maong proyekto.

"sa pagka-karon man gud, ang istado sa atong covered court kay makasulod ang salibo kun mo-ulan," matud pa ni Zafra.

Sa higayon nga mahuman na kini, makabaton na ang maong tunghaan og hamugaway nga covered court, nindot nga bleachers, ingon man usab lapad nga entablado.

Dugang pa niya nga dili pud basta-basta ang rekord sa Tisa II Elementary School sanglit ubay-ubay na nga national awards ang nadawat niini.

Nasayran nga nailhan ang maong tunghaan sa nindot niini nga performance sa matag tuig nga Brigada Eskwela.

Mapasalamaton si Zafra sa pamilyang Cokaliong gumikan kay wala gyud kini nagduha-duha sa pagsanong sa dihang gihangyo kini nila ni Acting Mayor Michael Rama nga tabangan ang pagpausab sa covered court sa Tisa II Elementary School.

Matud pa ni Rama nga dili na maihap sa kadaghang natabangan sa mga Cokaliong.

Gani pipila ka tuig na ang nilabay, gihangyo ni Rama si Cokaliong nga mosulod sa politika gumikan sa nindot nga record niini apan nibalibad kini sa iyang tanyag.

Giingong naa gihapon ang dedikasyon ni Cokaliong sa pagtabang sa iyang isigkatawo bisan dili pa kini mosulod sa politika. —MEL (BANATNEWS)