Pagtukod og learning hub sa brgy gisugyot

CEBU, Philippines — Si Cebu City Councilor Alvin Dizon mi-proposed og ordinansa nga mag-establisar o mopahiluna og learning hub sa tanang Barangay sa siyudad sa Sugbo.

Ang maong measure gitawag og “The Barangay Learning Hubs Ordinance” ug gi-refer kini sa Committee on Laws, Ordinances, and Styling alang sa review.

Kini maoy maghatag og kahigayonan sa mga tinun-an nga way gadget sa pag-access ug internet connection diha sa barangay ug makabaton og lugar diin adto sila makapadayon sa blended learning, maka-comply sa ilang mga requirements ingon man makakaplag og mogiya sa ilang pagtuon. 

Tumong sa ordinansahon nga mahatagan og kalidad nga edukasyon ang tanang citizens og himoon accessible ang edukasyon ilabi na kadtong naglisud sa ilang pagtungha taliwa sa bag-ong sistema nonot sa COVID-19 pandemic.

Nalatid sa Section 4 sa ordinansahon ang pagtukod og learning hub sa matag barangay nga magsilbing learning facility aron pagsuporta sa mga learners pinaagi sa libreng pag gamit sa computers, gadgets, equipment, internet ug tutors o learning facilitators nga maghatag og giya sa mga tinun-an.

Ang Barangay makig-alayon sa ubang sector ug organisasyon apil na ang parents-Teachers Association sa operasyon sa ilang learning hub.

Ang Local School Board (LSB), ABC, ug SK Federation maoy moumol og implementing offices aron pagsiguro sa enforcement ug monitoring sa implementasyon sa ordinansa.

Kun maprubahan tagan-an kini og pundo nga moabot sa P10 million nga adto kuhaon sa general fund sa siyudad. MEL (BANATNEWS)