Biker giatake diha sa Manipis, luwas ra ang kahimtang

CEBU, Philippines — Usa ka biker ang giingong giatake samtang nagbiseklita sa barangay Manipis niadtong Sabado sa buntag.

Si Rogelio Biason nga taga Barangay Jaclupan nagpasingot pinaagi sa pagbisikleta uban sa iyang mga higala.

Apan sa iyang pagtangas sa bukirang barangay sa Talisay kalit siyang natagak sa iyang biseklita ug maayo nalang kay dali kining natabang sa mga sakop sa City Disaster Risk Reduction and Management Office (CDRRMO). Base sa pagsusi giingong niubos ang sugar ni Biason hinungdan sa iyang pagkolaps.

Ang mga bikers nihulagway nga dako og tabang ang nag- estambay nga mga sakop sa CDRRMO sa bukirang barangay tungod kay dali kini nga makaresponde sa mga panghitabo.

Una niini, si Mayor Gerald Anthony “Samsam” Gullas nimando sa CDRRMO nga magbutang og mag estambay ang ambulansya aron dali kining makatubag sa mga alarma labot sa mga disgrasya sa mga bikers.

Kini human sa sunod-sunod nga panghitabo nga naglambigit og mga aksidente sa mga bikers nga motangas sa maong lugar. MEL (BANATNEWS)