OBO: Safety officer manubag sa aksidente sa construction site
CEBU, Philippines — Gipahimangnoan ni Architect Florante Catalan sa Office of Building Official OBO ang safety officers sa tanang construction sites dinhi sa siyudad nga magtarong sa ilang trabaho aron malikayan ang mga aksidente.
Nasayran nga matag construction gi-require gyud ang safety officers nga mosusi sa nagpadayon nga trabaho sa usa ka proyekto.
Kun dunay mga mahitabo nga dili maayo, sila maoy una nga manubag.
“Sila una’y manubag… liable gyud sila,” suma pa ni Catalan.
Matud pa niya nga sa matag construction site, kinahanglan gyud nga ipatigbabaw ang kaluwasan sa mga trabahador.
Nasayran dunay duha ka construction worker ang nakalas sa aksidente sa usa ka construction site sa miaging adlaw didto sa South Road Properties.
Nahagba ang gondola gikan sa ika-19 nga andana nga niresulta sa kamatayon sa duha ka mga indibidwal.
Giklaro ni Catalan nga ang mga gondola alang ra kini sa mga tawo ug dili mahimong sakyan og construction materials.
Nagkanayon si Catalan nga malikayan unta ang maong insidente kun gipaneguro sa safety officers ang pagpahimutang sa mga equipment sa site.
Gipahunong una ang trabaho sa maong site ug dili pa matino kun kanus-a kini makabalik sa operasyon sanglit naghuwat pa sila og incident report ingon man usab sa ubang mga dokumento.
Samtang si Konsehal David Tumulak, niawhag usab sa tanang nag-operate og construction sites nga i-report dayon kun dunay aksidente aron mapangitaan dayon kini og dinalian nga aksyon. —MEL (BANATNEWS)
- Latest
