Mga taga Burial Office pahataga’g hazard pay

CEBU, Philippines — Giawhag sa Cebu City Council  ang executive department nga hatagan og  hazard pay ang mga empleyado sa Cebu City  Burial Office kay peligroso usab sila gikan sa COVID-19.

Matud pa nga magsilbi kining incentive alang kanila gumikan sa ilang dedikasyon sa trabaho. Si Konsehal  David Tumulak ang sponsor a sa resolusyon ug giaprobahan dayon kini sa konseho.

“Because of this task, the employees and workers of the Cebu City Burial Office are at heightened risk of exposure to possibly infected individuals due to the nature of their functions, and the responsibilities entrusted to them,” suma pa ni Tumulak.

Kahinumdan nga niisyu si Mayor Edgardo Labella og  executive order pipila ka semana ang nilabay  nga maghatag og financial assistance aron maoy gamiton sa pagpabayad sa lubong alang sa mga nangamatay tungod sa COVID19.

Ang Cebu City Burial Office maoy  gitugyanan sa lapad nga implementasyon sa maong EO kun diin  nahisgotan niini ang P16,000  nga burial assistance alang sa mga namatay  nga ilubong sa regular nga pamaagi , samtang P35,000 alang sa gustong i-cremate ang patay nga lawas. Tumong niini nga  dili na maglakaw-lakaw ang mga tagtungod nga giingong expose sa namatay. Ang hinabang direkta kining itunol sa puneraryang napilian sa tagtungod. Ang taga punerarya ra sab ang mokuha sa requirements ngadto mga tagtungod nga naglangkob sa affidavit of undertaking sa  punerarya , death certificate ug  barangay certificate. —IBM (BANATNEWS)