Hinabang giapod apod sa kaparian sa Bantayan
CEBU, Philippines — Nagmalampuson sa miaging adlaw ang ikawalo nga distribusyon sa “Gifted to Give - Bags of Hope” ngadto sa mga parokyano sa Isla sa Bantayan nga gipasiugdahan sa Roman Catholic Archdiocese of Cebu ug Five Loaves Two Fish Inc. (FLTF, Inc.)
Mao kini ang labing lapad nga hugna sa pag-apod apod og “bags of hope” diin niabot og 700 recipients gikan sa pito ka mga parokya sa isla ang nakatagamtam sa maong kaayohan.
Aron malikayan ang pagdumog sa mga tawo, gi-turn over sa FLTF ang relief packs ngadto sa kaparian ug sa ilang mga miyembro sa Parish Pastoral Council ug mao kini ang niumol sa hapsay nga distribusyon.
Sa report sa FB Page sa Archdiocese of Cebu, gisaulog ang usa ka Santos nga Misa sa wala pa gihimo ang turn-over.
Nangulo sa misa mao si Rev. Fr. Marcelino Agravante Jr., ang Episcopal Vicar sa Bantayan Island.
Nitambong pud ang mga kaparian sa nagkadaiyang parokya sa maong isla nga sila si Fr. Dave Villaceran (Sto. Nino Parish, Sta. Fe), Fr. Arvin Pretila (Sacred Heart of Jesus Parish, Tangkong), Fr. Jose de Dios (St. Francis of Assisi, Madridejos), ug Fr. Jimmy Tolentin (Immaculate Conception Parish, Centro Madridejos).
Atol sa iyang wali, gipadayag ni Fr. Agravante nga bisan sa pandemya, ipadayon gyud ang mga pagtulon-an gikan sa Kahitas-an ilabi na sa paghigugma ug pagtabang sa isigkatawo.
“In this time of the pandemic of COVID-19, which became the occasion that the love and generosity of others awakened, may it lead others to acts of generosity and may it not fade away when the pandemic ends,” suma pa ni Fr. Agravante. MEL (BANATNEWS)
- Latest
