Bag-ong kahimanan sa kabomberohan sa siyudad
CEBU, Philippines — Dunay bag-ong kahimanan ang Cebu City Fire Office diin ma-monitor nila dili lang sunog apan lakip na sab ang ubang panghitabo sa siyudad ug sa mga silingan nga lugar.
Ang maong kahimanan mao ang 360 Closed Circuit Television nga naa gibutang sa firewatch tower sa Parian Fire Station diha sa Natalio Bacalso Avenue ning siyudad.
Matod ni Senior Fire Officer 1 Wendel Villanueva tigpamaba, sa Cebu City Fire Office nga ang pagbutang sa 360 CCTV camera programa kini sa ilang buhatan aron mas hingusgan pa ang ilang fire prevention campaign.
Tumong sa pagbutang og tawo ingon man camera sa ilang firewatch tower aron kun dunay makita nga black smoke nga timailhan nga dunay developing fire makaresponde dayon ang kabomberohan bisan paman og wala sila kadawat og tawag gikan sa publiko.
Si Senior Fire Officer 3 Marissa Cariño, pangulo sa Communication Section sa Cebu City Fire Office miasoy nga gawas sa pagresponde sa sunog, pinaagi sab sa bag-ong kahimanan, makaresponde sila og mga katalagman, aksidente sa kadalanan ug pag-transport og mga pasyente gamit ilang ambulansiya.
Nasayran nga P6 million ang kantidad sa maong kahimanan apan dili lang camera ang naglangkob niini tungod kay naa sab kini installation alang sa GPS trackers sa mobile assets aron paspas ang ilang pag-responde.
Gawas niini apil sab sa P6 million ang rescue equipment alang sa mga collapsed structure incident dili lang sa Cebu City apan lakip na sa ubang lugar nga manginahanglan sa ilang ekipo. —MEL (BANATNEWS)
- Latest
