Mga frontliner pasidunggan isip mga bag-ong bayani

CEBU, Philippines — Gipahibalo sa Cultural and Historical Affairs Office (CHAO) sa Dakbayan sa Sugbo nga ang  pagpahinungod  sa tanang frontliners nga nakigbatok sa pandemiya maoy usa sa mga highlight  sa kasaulogan  karong buwana sa pagtimaan sa mga bayani dinhi sa nasud.

Matud ni Bryner Diaz, pangulo sa CHAO nga dili lalim ang mga nasinati karong panahona sa frontliners ilabi na nga kapin na sa usa ka tuig ang COVID-19 pandemic.

Si Diaz nagkanayon nga buwan karon sa pagtimaan sa mga gihimo sa mga bayani kaniadto hinungdan nga haom usab ang paghatag og recognition sa mga modernong bayani.

“Dili intawn lalim ang giagian sa atong frontliners, ang uban gani kay nakabsan intawon sa ilang kinabuhi”, ni Diaz pa.

Sa karaang panahon, moabot sa liboan ang natala nga mga bayani nga Sugbuanon.

Ang uban niini mga sundalo, medical practitioners ug uban pa nga mga personalidad kinsa nakigbisog sa pagpanalipod sa nasud.

Pipila sa mga Sugbuanon nga karaang bayani mao sila si Lapu-Lapu,  Sergeant Julian Lao, Colonel Manuel Segura, Juan Climaco, Julio Llorente, Leon Kilat, Candido Padilla, Toribio Padilla ug uban pa.

Nagkanayon si Diaz nga ang binuhatan sa mga karaang bayani maoy hiyas usab sa mga modernong bayani nga nanalipod usab sa isigkatawo aron dili mosamot ang gisagobang nga problema ilabi na ang pagkuyanap sa COVID-19.

Ang culmination mahitabo karong Agosto 30, 2021 atol sa kasaulogan sa National Heroes’ Day.

Adunay giandam nga simple nga kalihokan ang kagamhanan sa Siyudad sa Sugbo alang niini.

Dugang ni Diaz nga online ang kasagaran nila nga kalihokan gumikan sa nagpadayon nga hulga sa COVID-19. BDB (BANATNEWS)