Kapolisan sa Minglanilla nag-andam og oxygen concentrator

CEBU, Philippines — Ang kapolisan sa Lungsod sa Minglanilla nag-andam og oxygen concentrator panagana nga aduna silay daling magamit kong ugaling adunay personnel nila nga nagkinahanglan niini

Si Police Master Sergeant Christopher Cesa, Police Community Relation (PCR) sa kapolisan sa lungsod nibutyag nga hinatag sa higala ni Police Major William Homoc ang maong oxygen.

Ug gihangop nila kini aron aduna sila’y magamit panahon sa emerhensiya.

Ang oxygen concentrator makatabang sa tawo nga maglisod og ginhawa ilabi na sa mga matakboyan sa COVID-19.

Matud ni Cesa nga ang kapolisan kanunay kini ng anaa sa kadalanan diin adunay posibilidad nga mataptan sa virus hinungdan nga nangandam na sila.

Bisan sa hulga sa COVID-19 ang kapolisan wala kini hunong sa ilang paghatag og serbisyo ngadto sa katawhan. (Gabriel C. Bonjoc/BDB)

4- anyos nga nataptan og Covid

Usa ka 4 anyos nga batang lalaki ang natakbuyan sa coronavirus disease sa Dakbayan sa Talisay. Lakip siya sa 50 ka mga bag-ong kasong natala sa siyudad sa gipagawas nga datos sa Department of Health niadtong adlaw nga Biyernes.

Ang maong bata nakasinati og taas nga hilanat hinungdan nga gipaubos sa swab test hangtud nahibaw-an nga nagpositibo sa virus. Ang bata gikan sa Barangay Biasong sa nahisgutang siyudad.

Sa maong talaan nga nagpetsa niadtong Biyernes, 23 sab ang nakarekuber sa virus.  Sa 22 ka barangay sa Talisay ang dunay kinadaghanan og kaso mao ang Barangay Lawaan 1 nga adunay 45 ka kaso, sunod ang Dumlog nga adunay 43 ka kaso ug ikatulo ang Cansojong sa ilang 28 ka kaso.

Ang Talisay aduna nay 3,857 nga kinatibuk-ang kaso ug 209 na ang namatay samtang 355 ang aktibong kaso ug 3,923 na ang nangaayo.— IBM (BANATNEWS)