Probinsiya moduso og protesta batok kang Salvana

CEBU, Philippines — Ang Probinsiya sa Sugbo moduso og “letter of protest” ngadto kang Health Secretary Francisco Duque kalabot sa gipagawas nga pamahayag ni Dr. Edsel Salvana.

Si Salvana nagkanayon nga ang pipila ka outbreak sa Delta variant sa Mindanao naglambigit sa returning Filipinos nga niagi sa Cebu airport.

Si Salvana usa sa mga miyembro sa Technical Advisory Group (TAG) sa Inter-Agency Task Force (IATF).

Matud niya nga ang TAG hagbay ra nga nipahimangno nga kinahanglang istrikto ang protocol tungod sa hulga sa highly transmissible nga Delta variant.

Ang Probinsiya sa Sugbo wala kini makauyon sa maong pamahayag ug si Gobernador Gwendolyn Garcia nikwestiyon nganong ang Sugbo ang basolon nga hugot man ang gipatuman unta nga protocol niini alang sa mouli nga OFWs ug ROFs.

Matud ni Garcia nga human sa pag-anhi sa Sugbo nila ni Duque uban ang pipila ka miyembro sa IATF niadtong buwan sa Hunyo niining tuiga wala gihapon itugot sa national government ang hangyo sa Sugbo nga mopatuman sa kaugalingong protocol niini sa mga OFWs.

Ang IATF ug ang Probinsiya sa Sugbo adunay lain-laing protocol sa OFWs ug ROFs nga mobyahe sa Pilipinas kaniadto.

Ubos sa IATF nga protocol, ang moabot nga ROFs ug OFWs ikwarantina sa mga hotel ug sa ika-pito ka adlaw ipaubos sa RT-PCR test.

Sa Probinsiya sa Sugbo, nipatuman kini og swab-upon-arrival policy ug samtang gahulat sa resulta ikwarantina usa og duha ngadto sa tulo ka adlaw sa quarantine hotel.

Ug kon mogawas nga negatibo ang swab test makauli ang OFW ug adto ipadayon ang kwarantina sa iyang balay o sa Local Government Unit facility ug dayon sa ika-pito nga adlaw i-swab test og balik.

Ang managlahing protocol nahimong lalis ug maoy hinungdan nga gi-divert usa sa national government ang tanang inbound international flights sa Mactan Cebu International Airport padulong didto sa Ninoy Aquino International Airport.

Si Garcia nihulagway nga iresponsable ug totally biased ang deklarasyon diin wala kini klarong datos nga nagsuporta.

Ang provincial board mopasar usab og resolusyon pag-call out sa maong doktor tungod sa pamahayag niini.

Si Garcia nihagit kang Salvana nga paluyohan og datos ang iyang pamahayag. —/BDB (BANAT NEWS)