Dr. Utlang nadismaya human gibalhin og laing posisyon

CEBU, Philippines — Imbes nga malipay, gipabuhagay ni Dra. Alice Utlang ang iyang kasubo human gibalik siya sa orihinal niya nga departamento , ang Department of Veterinary Medicine and Fisheries (DVMF),  apan dili na usa ka  department head.   

Si Utlang maoy kanhi pangu sa DVMF ug gibalhin siya sa Cebu City Resource Management and Development Center (Cremdec) sa pagsugod sa administrasyon ni Mayor Edgardo Labella niadtong 2019.

Suma pa ni Utlang nga dako kining insulto kaniya, ug gihulagway niya nga nag-usik usik og kuwarta ang kagamhanan sa Siyudad sa Sugbo sanglit ang rate sa iyang suweldo tukma alang sa usa department head.

Base sa suwat nga iyang nadawat, kinahanglan siya nga mo-report ngadto sa officer-in-charge sa DVMF nga si Dra. Jessica Maribojoc.

Niapelar na siya kang Mayor Edgardo Labella ug nagpaabot na lang siya sa tubag niini. Samtang nagpaabot sa tubag, pabiling siya nga mo-duty sa CREMDEC.

 "Wala man koy problema ni Doc. Jessica kay akoa manang division head sauna. Apan kanang memo nga akong nadawat ron, wala gyud ko kasabot nila kasamtangang administrasyon kay pagpakaminos man ang ilang gibuhat dinhi kanako, " matud pa ni Utlang.

Giklaro ni Utlang nga bisan kinsa pa ang mayor nga naglingkod, mohatag gyud siya sa tinud-anay niya nga serbisyo sa katawhan sanglit mao man kini ang iyang mandato.

Matud pa niya nga sa iyang pagka-veterinarian sulod sa taas nga panahon, wala gyud siya nagbinuang sa iyang trabaho, gani makapila na siya ka higayon nga nakadawat og awards sa national level.

" Ako man gud,  motrabaho gyud og tarong  ug dili gyud na mahitabo nga mangumpanya ko og politiko, "pagklaro ni Utlang kalabot sa intriga nga matud tawo siya ni kanhi Mayor Tomas Osmeña.

Lakip nga gibalhin sa DVMF mao ang kanhi department head sa Cebu City Agriculture Department (CAD) nga si Joey Baclayon. —MEL (BANATNEWS)