Lalaki gipusil diha sa Manmade Forest

CEBU, Philippines — Usa ka lalaki nga wala nay kinabuhi ang nakit-an sa may Manmade Forest, National Highway, Barangay Tubigagmanok, Lungsod sa Austurias, alas sais dies sa buntag adlaw nga Biyernes.

Ang maong lalaki giba-banang nagpangidaron og 18 ngadto sa 28-anyos, naka green t-shirt nga adunay tatak Reebok, ug naka shortpants nga color maroon, ug naka tsinelas.

Matud pa ni Police Master Sergeant Bendie Nuñez, Desk Officer sa Austurias Police Station naglunang na sa iyang kaugalingong dugo ug wala nay kinabuhi ang biktima sa pagabot sa mga polis didto.

Giingong mga alas nuybe ngadto sa alas diyes sa gabii adtong adlaw nga Huwebes giingong adunay sakyanan nga nagtambay sa lugar diin nakit-an ang patay nga lawas sa biktima.

Paglabay sa pipila ka gutlo adunay nadunggan nga buto sa armas gikan sa maong lugar, apan kagahapon sa buntag na adlaw nga Biyernes nadiskubrehan ang patay nga lawas nga adunay samad sa iyang dughan ug nawong.

Gibutyag ni Nuñez, nga adunay nakuha nga pangalan ang SOCO gikan sa patay nga lawas apan ila pang gisusi kung mao ba kini ang maong tawo. —IBM (BANATNEWS)