Mga vendors sa Carbon gihatagan na og stall certificates
Cebu, Philippines — Nagpadayon ang pagpanghatag og stall certificates sa mga vendors diha sa Carbon Market aron pagsiguro nga makatinda kini sa bag-ong tukoron nga merkado diha sa Unit II sa Barangay Ermita, Dakbayan sa Sugbo.
Ang Cebu City Government ug Megawide Construction Corporation nanghatag og dugang kapin sa 100 ka mga certificate nga maoy magsiguro nga makatinda ang mga vendors sa tukoron nga interim market.
Nasayran nga kapin sa 700 ka vendors ang masulod sa maong interim market ug nagpadayon gihapon ang pag-apod apod sa mga sertipiko. Una na nga gipasalig sa kagamhanan sa Siyudad sa Sugbo ug Megawide nga mahatagan gyud og puwesto ang mga vendor sa Carbon.
Mao kini ang rason nga gihulma ang sertipiko aron pagpaneguro nga ang mga vendors mahimong makabaligya sa tukoron nga merkado.
Ang maong area, adunay hamugaway ug moderno nga desinyo. Ang temporaryo nila nga puwesto posibleng mahuman sa katapusang bahin karong tuiga. (BANAT NEWS)
- Latest
