Frontliners pasidunggan atol sa Independence Day

CEBU, Philippines — Isip pagtimaan sa ika-123 nga Anibersayo sa Kagawasan sa Pilipinas gikan sa pagkaulipon sa Espanya niadtong Hunyo 12,1898, mopadangat  og pasidungog  ug pasalamat si Bise Mayor Michael Rama  sa frontliners sa tibuok Dakbayan sa Sugbo nga nakigbisog  pagsugpo sa COVID-19.Dunay seremonyas nga himoon karong Hunyo12, 2021 alang sa maong pagpasidungog.

Nagkanayon ang bise mayor nga bulahan kaayo ang Dakbayan sa Sugbo tungod kay adunay kugihan nga mga tawo nga nisakripisyo aron anam-anam kini nga makalingkawas sa health crisis. Giila sa bise mayor nga modern heroes mao ang health workers, doctors, nurses ug uban pang frontliners sa Cebu Medical Society, AMRO, EURF, Philippine National Police, Emergency Rescue Unit Foundation, Secretary Roy A. Cimatu, Retired Maj. Gen. Melquiades L. Feliciano, Michael J. G. Gleissner , mga pribadong sektor ug sa tanang niabagug nigahin sa ilang oras sa pakigkumbate sa pandemya.

Nalakip usab sa listahan ang head sa Cebu City Emergency Operations Center (EOC) nga si Konsehal Joel Garganera, ug Atty. Agusto W. Go sa University of Cebu. Gipasalamatan usab niya ang SM Group ug ang Robinson sa pagpagamit sa ilahang pasilidad alang sa vaccination program sa Siyudad. MEL (BANATNEWS)