Diskwento alang sa solo parents dili pa mapatuman

CEBU, Philippines — Nipasar og resulosyon ang Konseho sa Siyudad sa Sugbo nga nag-awhag sa  Department of Social Welfare Services (DSWS) nga maghatag og update sa implementasyon sa city ordinance no. 2556 o ordinansa nga maghatag og diskuwento ug uban pa nga incentives ngadto sa solo parents.

Suma pa sa author niini nga si Konsehal Alvin Dizon nga sa last quarter pa niadtong 2019 napasar ang maong ordinansa.

Matud pa sa konsehal nga ang DSWS maoy gitugyanan alang sa pag-umol og pamaagi ug regulasyon sa pag-implementar sa maong ordinansa.

Ang pangu sa DSWS nga si Portia Basmayor sa iyang pag-atubang sa konseho kagahapon, mitug-an nga wala pa sila makaumol og guidelines alang sa maong ordinansa ug nagpadayon pa sila karon sa pag-identify sa indigents nga solo parents.

Nasayran panahon sa pagsugod sa pandemya, nakadawat ang solo parents og bugas gikan sa kagamhanan.  Samtang si Dizon sa iyang bahin, nitataw nga dili unta angayan pasagdan ang mga gipangpasar nga mga ordinansa.

"Sama unta karon nga naa ta sa pandemya, gamit gyud unta kaayo ang dugang diskuwento nga mapahimuslan sa solo parents kun duna silay paliton sa grocery stores, " matud pa ni Dizon.

Nagkanayon ang konsehal nga wala ra untay magasto ang siyudad sa implementasyon niini sanglit ka-partner nila ang pribadong sektor.

Panawagan niya sa tanang departamento sa city hall nga kun mahatagan gani kini og responsibilidad ilabi na sa mga napasar nga ordinansa sa legislative department ,lihokon gilayon kini sanglit makahatag kini og dakong kaayohan ngadto sa mga konstituwente sa Siyudad sa Sugbo. —MEL (BANATNEWS)