Ikaduhang dose sa bakuna gihatag na

CEBU, Philippines — Gisugdan kagahapon, Lunes, Mayo 10, 2021 sa siyudad sa Sugbo ang paghatag sa second dose sa Sinovac vaccines sa 710 ka tawo sigon pa ni Dr. Jeffrey Ibones, pangulo sa Cebu City Health Department.

Apan samtang gisugdan na ang paghatag sa ikaduhang dose, gipahibalo sab sa CCHD nga nahunong na sab ang pagpamakuna sa mga senior citizens nga naka-eskedyul nga hatagan og unang dose tungod kay nahurot na sab kini.

Ang paghatag sa second dose sa Sinovac vaccine gipahigayon sa Robinson’s Galleria ug University of Cebu Senior High School building Banilad Campus nga pulos vaccination sites sa Cebu City.

Magpadayon ang paghatag sa second dose sa Sinovac vaccines karong adlawa Mayo 11, naa sa 237 ka tawo ang hatagan niini; inig Mayo 12 moabot sa 409 ka tawo ang expected nga mabakunahan ug sa Mayo 13 naa sa 645 ka tawo ang makadawat sa second dose.

Kun dunay dili makatunga tawagan kini ug pangutan-on sa rason kay importante kaayong makompleto ang bakuna aron ma-develop ang ilang anti-bodies batok sa COVID-19.

Sa pikas bahin nahurot na niadtong  Biyernes, Mayo 7 ang 9,000 doses sa Sinovac vaccines alang sa mga senior citizens maong hunongon una ang pagpamakuna samtang nagpaabot sa sunod nga supply gikan sa DOH-7.

Kapin 10 mil na ka mga senior citizens ang nabakunahan apan wala pa kini katunga sa total populasyon sa rehistradong senior citizens sa siyudad nga 90 mil base sa rekord sa Office of the Senior Citizens Affairs(OSCA).

Nasayran nga moabot sa 35,000 ka mga senior citizens ang nagparehistro ug kapin 20 mil niini ang gustong magpabakuna.

Sa laing bahin, ang Cebu City napun-an og 30 ka bag-ong kaso sa Covid-19 samtang 44 ang nadugang sa mga nangaayo, duha ang dugang nakalas.

Ang Mandaue City nakatala lang og unom ka bag-ong kaso ug napulo ka dugang nangaayo.

Samtang ang Lapu-Lapu nakatala lang sab og unom ka bag-ong kaso, 97 ang dugang nangaayo ug dunay usa nga napuno sa mga nangamatay.— IBM (BANATNEWS)