150 ka indibidwal nahatagan og relief packs sa PRO-7

CEBU, Philippines — Niabot sa 150 ka indibidwal sa Barangay Bangkal, Dakbayan sa Lapu-Lapu ang nakadawat sa relief pack atol sa relief operation ug outreach program sa Police Regional Office-7 subay sa Barangayanihan kagahapon. Ang nahisgutang lugar maoy gipili sa anak sa direktor sa PRO-7 Police Brigadier General Ronnie Montejo tungod kay kaniadto nakapuyo sila diha sa maong lugar.

Ang PRO-7 nipahigayon usab kini og relief operation ngadto sa Negros Oriental, Bohol ug Lungsod sa Liloan.

Niadtong Sabado ang PRO-7, Cebu Police Provincial Office ug Cebu City Police Office nipahigayon og simultaneous nga pagbukas sa ilang kaugalingong version sa community pantry. Gawas sa mga produkto, ang PRO-7 nihatag usab og libreng sakay sa mga residente nga nangadto sa lugar ug milinya alang sa pantry.

Sa susamang adlaw gibuksan sa CPPO ang ilang pantry sa komunidad diha sa sulod sa ilang buhatan sa Barangay Lahug, Dakbayan sa Sugbo. Ang maong kalihokan dungan nilang gibuksan uban ang 50 ka police station sa tibuok Probinsiya sa Sugbo nga gipangulohan ni Police Colonel Engelbert Soriano, director sa CPPO.

Niadtong Abril 30, gibuksan usab sa CCPO ang community pantry dungan sa 11 ka  police station sa siyudad. BDB