Burial assistance sa Barangay Guadalupe giumentohan

CEBU, Philippines — Giumentohan sa Barangay Guadalupe ang ilang ihatag nga burial assistance sa mga mamatay nga residente sa barangay.

Atol sa ilang sesyon sa miaging adlaw giumentohan kini gikan sa P7,000 mil ngadto na sa P10,000 mil ang madawat nga burial assistance sa mga rehistradong residente aron makaabag sa galastohan sa namatay..

“Lisod gyud ang panahon karon ilabi na nga nag-atubang ta og pandemya. Kun dunay namatyan, dili gyud lalim ang gasto, maong nakahuna-huna ang barangay nga patas-an ang burial assistance,” suma pa sa Kapitan sa Guadalupe nga si Michael Gacasan.

Nagkanayon si Gacasan nga P2 million ang gigahin sa maong programa ug andam rapud moduso og supplemental budget ang barangay council kun makuwangan kini.

Sama sa naandan, kinahanglan nga rehistrado nila nga residente ang namatay aron makapahimulos sa burial assistance.

Nasayran nga ang Guadalupe maoy labing una nga barangay sa Siyudad sa Sugbo nga niumol sa maong programa pipila ka tuig na ang nilabay ug gisundog na usab kini sa ubang mga barangay.

Matud pa sa kapitan nga dako na kaayo og tabang ang maong kantidad ilabi na nga magsilbi kini nga adisyonal nga  assistance sa  naandan nga burial assistance gikan sa Cebu City Government nga mokabat usab sa P10,000. —MEL (BANATNEWS)