SUGBUsog program gilusad na sa Kapitolyo

CEBU, Philippines — Gikan sa mga purok ug barangay ngadto sa local government units gilakip na karon sa Probinsiya sa Sugbo ang mga eskwelahan nga moapil sa SUGBUsog program niini.

Gilusad niadtong Huwebes ang “SUGBUsog sa Eskuylahan, Estudyanteng Busog, Luwas ug Himsog” diha sa Kapitlyo diin gi-turnover sa mga opisyal sa Kapitolyo nga gipangulohan ni Gobernador Gwendolyn Garcia ang mga basket nga adunay vegetable seeds ug organic fertilizer ngadto sa Department of Education-7 nga gipangulohan ni Director Salustiano Jimenez ug ang mga school division superintendent ug district supervisor lukop probinsiya.

Ang mga tunghaan pinaagi sa mga magtutudlo maoy mananom sa mga gihatag nga binhi sa utanon ngadto sa ilang mga eskwelahan diin ipaagi kini og contest.

Nasayran nga ipaagi sa level ang pag-evaluate ug pagpili aron makapadayon sa laing level sa kompetisyon sa pinakamaayo nga pagtanom sa mga utanon.

Matud ni Garcia nga ang mga municipal ug city agriculturist maoy mo guide sa mga magtutudlo ug adunay guidelines usab nga iimplementar.

Adunay dugang puntos kong iapil ang pagbuhi og native chicken, aquaponics nga maapil usab ang tilapia, ilakip ang pananom og nangka ug lakatan.

Apil usab nga itanom ang mga medicinal plant ug adunay dugang puntos usab kon ang eskwelahan makahimo og produkto gikan sa utanon o gitanom niini.

Gikan sa school district kadtong mga champion nga eskwelahan mao kadto ang mosangka sa legislatave district level diin ang mga bokal apil nga mo-evaluate ug mopili sa pinakamaayo nga pagtanom.

Human sa legislative level pilian na usab ang province wide nga champion nga distrito.

“Ang premyo gyud niana is the honor of being the best schools and the best district but certainly we will also be give you infrastructure projects that you may need as prices sa inyong efforts”, matud ni Garcia. —BDB (BANATNEWS)