Clearing operation gipahigayon sa Carbon

Cebu, Philippines — Isip pagpangandam sa Oplan Seman Santa ang tinugyanan sa Market Operations Division (MOD) ug Cebu City Transportation Office (CCTO) nagpahigayon og clearing operation sa Carbon Public Market kagahapon sa buntag.

Matud ni Market Operations Division Chief Irvin Cabales ang ilang gihimo maoy kabahin sa  pagpatuman na unya sa palisiya nga wala’y pasudlon nga mga pribadong sakyanan sa Carbon Public Market gawas lang sa mga delivery sugod karong adlaw’ng Lunes, Marso 22 hantod sa Abril 3, 2021.

Si Cabales miingon nga gisugdan na nila ang clearing operation sa merkado kay gusto nila makita kun asang dapit ang problema ug asa posible parking area ingon man ang mga dalan nga pwedeng isira ug mahimong ablihan lang aron hapsay ang dagan sa trapiko.

Ang Office-in-Charge sa CCTO Lyntoni Sable miasoy kadtong mga guba nga sakyanan nga naa na gi park sa Carbon Public Market gihatagan lang hangtud alas 12 sa udto kagahapon sa pag-clear niini, inig balik sa CCTO sa lugar kun makita nila nga duna pay mga sakyanan nga wala pa gikuha ilaha kining i-towing.

Mopagawas unya og advisory ang CCTO aron mahibawo ang mga tawo nga moadto sa Carbon nga magdala og mga sakyanan kun asa sila mahimong mo-park.

Kadtong mga delivery, human sa pag-load ug unload sa ilang karga kun kinahanglan nila mo standby adto sila sa Warwicks Barracks mo-park  aron malikayan ang kahuot sa merkado.

Gawas sa mga personnel sa Cebu City Government, abagan sab sila sa Cebu City Police Office aron masiguro gyud nga mapatuman ang palisiya nga ilang gipagawas diha sa Carbon Public Market. (BANAT NEWS)