Paghawok, gakos, ug holding hands sa publiko lugar idili?

Cebu, Philippines — Managlahi og opinyon ang katawhan mahitungod sa gipatuman karon Philippine National Police nga nagdili sa Public Display of Affection (PDA) gumikan sa nagkasaka ng kaso sa coronavirus disease (COVID)-2019.

Si PNP Spokesman Brigadier General Ildebrandi Usana miingon nga kalapasan sa health protocols ang paghawok, gaksanay, ug bisan ang pagkuptanay og mga kamot sa mga tawo sa pangpublikong lugar.

Apil niini ang mga magtiayon, managkabanay ingon man manag-uyab kun makit-an ang kapulisan sitahon sila.

Si Rollan Cañete Jr., single, pabor sa maong kamanduan  kay alang sab kini sa kaayuhan sa tanan.

“Damay-damay na...Sa tinood lang wala man tay gusto ani pero para sa safety ato lang ni buhaton,” ni Cañete pa.

Samtang si Jose Corleone Nuñez, dili siya pabor sa mando sa PNP ilabi na sa habig sa pamilya, sa ngalan nga pamilya niya kuptan gyud niya.

“Ang kanang gikuan (mando) sa PNP pinasubay man na sa atong health protocol, di man na sukwahi. Motuman lang gud ta,” sigon pa sab ni Konsehal Joel Garganera, Deputy Chief Implementer for Inter-Agency Task Force Emergency Operations Center Cebu City.

Samtang si Lt. Col. Wilbert Parilla, Deputy City Director for Operations sa Cebu City Police Office miingon wala pa’y official directive o memorandum nga miabot sa ilang buhatan mahitungod niini.

“If ever maabot man sad na ang first nato nga buhaton is to inform the public about that directive so that dili sad sila makuratan nga duna diay ingon ani nga kamanduan, so information dissemination sa ta at first,” asoy pang Parilla. Base sa datos nga gipagawas sa Department of Health Central Visayas niadtong Miyerkules, Marso 10, ang Cebu City nakatala og 313 ka dugang nangaayo.

Duna kini karon 15,670 recoveries ug naa na sab sa 765 ang nakalas human napun-an og duha. Samtang 155 ang natala nga bag-ong kaso mao nga ang siyudad aduna na karoy 19,091 total cases apan 2,656 lang ang aktibong kaso.

Ang Mandaue City dunay 1,064 active cases sa 4,718 ang total cases niini human napun-an og 52. Ang recoveries sa siyudad naa sa 3,465 human dunay 28 nga nadugang ug 189 ang nakalas.

Samtang ang Lapu-Lapu City dunay 1,000 active cases gikan sa 4,691 total cases niini human 77 ang nadugang nga bag-ong kaso. Napun-an sab og 35 ang nangaayo  ug dunay usa na nakalas.

Sa datos sa Department of Health(DOH)-7 ang Central Visayas duna nay 42,781 total cases sa COVID-19; 6,573 ang active cases; 34,566 ang recoveries ug 1,642 ang deaths. (BANAT NEWS)