BFP subling nipahimangno paglikay sa sunog

CEBU, Philippines — Ang Bureau of Fire Protection (BFP) subli kini nga nipahimangno ngadto sa publiko mahitungod sa mga hinungdan sa sunog diin karong adlaw magsugod na usab ang pagsaulog sa fire prevention month.

Matud ni Senior Fire Officer 1 Wendell Villanueva, public information officer sa Cebu City Fire Office nga nikabat ngadto sa 192 ang kinatibuk-ang natala nga insidente sa sunog sa tuig 2020 taliwala sa pandemiya sa COVID-19 sa unang upat ka bulan.

Nasayran nga sa 192 ka insidente gibanabana nga nikabat ngadto sa P40,593,100 ang kantidad sa kinabuk-ang danyos.

Giingong ang maong gidaghanon sa insidente ubos kini kompara sa tuig 2019 nga niabot ngadto sa 457 ang insidente ug gibanabanang nikabat ngadto sa P16, 835, 125 ang danyos.

Sa buwan sa Enero niining tuiga, ang kabomberohan sa siyudad nakatala og siyam ka insidente diin ang danyos gibanabana nga nikabat ngadto sa P339,000.

Nunot niini, ang Mandaue City Fire Station nakatala og 85 ka insidente sa sunog sa niaging tuig.

Si SFO1 Jeric Alburo, chief administrator sa MCFS nibutyag nga siyam ka insidente sa sunog ang ilang natala gikan sa buwan sa Enero hangtud sa Pebrero niininng tuiga.

Lakip sa pahimangno sa kabomberohan nga pagngon ang appliances kong wala kini gamita ug dili biyaan ang mga gadget nga gi-charge.

Karong adlawa sugdan ang mga kalihokan sa fire prevention month nga adunay tema nga: "SA PAG-IWAS SA SUNOG HINDI KA NAG-IISA."

Human sa misa adunay dungan nga pagpatingog sa mga sirena sa tananh sub-station sa Siyudad sa Sugbo ug sundan sa “Oplan Ligtas na Pamayanan” diin ipahigayon ang mga fire seminar ug drill diha sa mga barangay.

Adunay motorkada usab nga ipahigayon nga magsugod diha sa SM Seaside ug anha sa SM City Cebu ipahigayon ang kickoff program. BDB (BANATNEWS)