Masuso gibiyaan diha sa Pari-an

CEBU, Philippines — Giatiman ug gipangga nga daw mura og ilang anak sa mga personnel sa Emergency Medical Services (EMS) Cebu City Fire Office ang usa ka tulo ka buwan nga batang lalake nga gibilin diha sa Parian Fire Station niadtong Domingo sa gabii.

Matud ni Senior Fire Officer(SFO) 3 Anadith Trasporte, Officer-in-Charge sa EMS giingong dunay volunteer nila nga nakakita sa usa ka babayeng nagbibit og masuso nga naglingkod sa Parian Fire Station.

Giingong gibilin niini ang bata sa lugar hinungdan nga ilaha kining gikostudiya. Si Trasporte mimando sa iyahang mga personnel nga makig-alayon sa Barangay Pari-an ug sa kapulisan nga miawhag nila nga ipa-blotter ang nahitabo.

 “Happy mi siguro naay gihatag ang Ginoo sa amoa nga usa sa among responsibilidad ba isip kami in public service, aside aning mopatay sunog ta, mo-rescue ta, so lahi sad ni kana bitaw serbisyo nga kami maoy nihatag og chance sa bata nga mabuhi pa siya, gitagaan namo og gugma,” sigon ni SFO3 Trasporte.

Nagpuli-puli og bantay, gipalitan sa mga gikinahanglan sama sa feeding bottle, diaper, gatas ug uban pa ang masuso.

Wala malikayi ni Trasporte nga mahimong emosyonal sanglit usa sab siya ka inahan ug gihulagway niya ang bata nga usa ka anghel.

Giklaro hinoon ni Trasporte nga wala nila hukmi ang inahan sa bata sa gibuhat niini sanglit wala sila nasayod sa rason ngano iyaha kining nabuhat. —IBM (BANATNEWS)