Dagan sa trapiko sa Minglanilla duna nay kausaban

Cebu, Philippines — Aduna nay nakitang kausaban sa dagan sa trapiko sa lungsod sa Minglanilla.

Kini human sa pila ka adlaw nga gipatuman ang no-left-turn policy sa maong lungsod.

Si Francis Sanguenza, pangu sa Minglanilla Traffic Commission (MITCOM) nagkanayon nga sa primero nga pagpatuman wala pa kaayo nila makita ang kalambuan.

Apan sa dihang aduna silay ginagmay nga gipang usab hinay-hinay nila nakita ang maayo nga resulta sa dagan sa trapiko.

Si George, drayber sa multicab niingon nga naa na gyud kalahian sauna ug sa karon nga dagan sa trapiko.

Usa sab ka pribadong tawo nga si Renante nitataw nga kadiyot na lang ang iyang byahe gikan sa siyudad paingon sa habagatang bahin sa sugbo.

Si Sanguenza nagkanayon nga ang maong kalambuan naggumikan sa hingpit nga pag-abag sa tanan nilang sakop.

Siya nidugang nga andam sila sa pagpatuman og mga kausaban sa ilang gihimo ug ipadayon ang paghatag ug tukma nga serbisyo aron mahimong hapsay ang dagan sa trapiko sa ilang lugar. (BANAT NEWS)