Paghimo og transport route sa Transcentral Highway gisugyot

CEBU, Philippines — Land Transportation Office 7 Regional Director Victor Emmanuel Caindec niawhag sa Local Government Units nga adunay local transport route plan nga himoon ilabi na diha sa may Trans central Highway sa sugbo.

Kini aron malikayan ang overloading sa mga sakyanan nga moagi sa lugar sama sa nahitabong aksidente sa Barangay Busay nga mikalas og 4 ka tawo. Matud pa ni Caindec, wala sila magkulang sa pahimangno diha sa Transcentral Highway, gani makadawat pa sila ug mga pagsaway kun mohimo og operation diha sa dapit.

Gumikan sa kakuwang sa public transport sa lugar dili malikayan nga mahitabo ang overloading sa mga sakyanan apil na ang motorsiklo.

Subay niini dunay plano nga mag-uban ang LGU ug LTFRB-7 aron susihon ang local transport route plan nga posibleng makahatag ug kasulbaran sa maong problema.

Samtang sa laing bahin moabot sa kapin 100 ka sakop sa Minglanilla Traffic Commission (MITCOM) ang motabang sa pagpatuman sa no- left- turn policy sa Lungsod sa Minglanilla  sunod semana.

Si Concordio Mejias, municipal administrator nibutyag nga kaniadto ra nga ilang gituki ang maong pamaagi aron masulbad ang kahuot sa dagan sa trapiko sa ilang dapit ug sila nalipay nga tinguha usab kini ni Governor Gwen Garcia.

Ang mga sakop sa MITCOM ipaubos nila sa seminar ug training lakip na ang task force nga maoy mopatuman sa bag-ong lagda.

Si Francis Sanguenza, pangu sa MITCOM nagkanayon nga mopatuman sila sa no-left-turn apan aduna sab silay itagana nga U-Turn slot. —Gabriel C. Bonjoc/MEL (BANATNEWS)