P7.5 milyones danyos sa sunog sa duha ka lugar sa Dakbayan sa Sugbo

Cebu, Philippines — Gibana-banang nikabat ngadto sa P7.5 milyones ang danyos sa nahitabong sunog niadtong Martes sa gabii diha sa Doña Maria Village, Barangay Punta Princesa ug Barangay Duljo Fatima, Dakbayan sa Sugbo.

Ang unang insidente nahitabo diha sa Doña Maria Village diin unom ka balay ang naugdaw hinuon walay gikataho nga naangol sa sunog.

Ang maong alarma sa sunog nadawat sa kabomberohan 8:49 sa gabii diin giingong  ang kayo nagsugod diha sa balay ni Jojie Fernandez.

Giisa ngadto sa ikaduhang alarma ang maong sunog diin ang kayo nakontrolar kini mga alas 9:21 sa gabii ug na-fire out alas 9:36 sa gabii.

Si FO2 Fulbert Navarro, imbestigador sa Cebu City Fire Department nagkanayon nga mopahigayon pa sila og dugang pakisusi kabahin sa maong hitabo.

Matud ni Navarro nga ang kayo sa sunog nagsugod sa likod nga bahin sa balay nga giukopan sa mga tenant.

Ang lugar aduna kini gilapdon nga 625 square meters ug gibana-banang nikabat ngadto sa P7.5 milyones ang danyos niini.

Samtang mga alas 9:04 sa gabii sa maong adlaw gihapon laing insidente sa sunog ang nahitabo diha sa Barangay Duljo Fatima.

Usa ka balay ang gikaon sa kayo sa maong sunog ug gibana-banang niabot ngadto sa P2,000 ang danyos niini.

Hinuon walay naangol usab sa maong insidente. (BANAT NEWS)