4 patay, 6 missing sa midahiling minahan

Cebu, Philippines — Upat ang gikatahong namatay ug unom ang padayon pang gipangita tungod sa nahitabong landslide sa open pit sa Carmen Copper niadtong Disyembre 21, 2020 sumala pa sa pamahayag sa maong kompanya.

“As of 1pm December 22, 2020, the Company solemnly regrets to inform that this incident has claimed four lives,” sumala sa opisyal nga pamahayag sa Carmen Copper Corporation (CCC).

Si Biga Barangay Kapitan Pedro Sepada sa siyudad sa Toledo diin nasakop ang maong minahan nipahibalo usab kagahapon nga naugkat na ang ikaupat nga lawas diha sa nahunlak nga yuta.

Ang tulo una nang naugkat alas 6 sa gabii niadtong Disyembre 21 sumala ni Sepada.

Padayon ang gihimong ang search and rescue operation nga giabagan na sa mga sakop sa Philippine Coast Guard.

Sa pamahayag sa CCC padayon ang ilang koordinasyon ug pakighinabi sa apektado nga pamilya sa insidente alang sa padayon nga tabang nga mahatag sa kompaniya.

“We humbly ask the public to exercise caution and responsibility in distributing information out of respect to the affected families,” hangyo sa CCC. Gusto unta ni Sepada nga makighinabi sa mga tagdumala sa kompanya apan matud pa wala siya pasudla sa mga gwardiya.

“Nakigkita man gud ko, didto ko sa admin kay gusto ko makigestorya sa ilang top management, di man pud sila makigestorya nako. Di ko kasabot nganong di sila makigestorya nga ang among gusto ra unta nga makuha nako ang habig nila ba unsay ilang pamaagi sa pag rescue...” matud ni Sepada.

Apan si Rosseller Layan tigpamaba sa Toledo City government nagkanayon nga nga wala una gipasulod ang mga responders didto tungod kay peligro pa kaayong mahugno ang natandog nga bahin sa ground zero ug gihan-ay pa ang tanan sa sulod aron masiguro nga walay madisgrasya.

Ang LGU sa Toledo mohatag og financial assistance sa pamilya sa mga biktima sa landslide.

Si Sepada nagkanayon nga sa niaging tuig pa siya nireklamo didto sa Mines and Geosciences Bureau (MGB) kalabot sa pagmina sa CCC sa ilang barangay apan wala kini aksyon nga nadawat gikan sa maong ahensiya.

Apil sa gipadad-an og suwat reklamo ni Sepada ang buhatan sa gobernador, buhatan sa Mayor sa Toledo.

“Wala gyuy aksyon nga nahimo hangtod nga ni collapse na lang ni among mina, nangadisgrasya tungod wa ko nila paminawa,” matud sa kapitan.

Ang Banat News nisulay og kuha sa pamahayag sa MGB-7 ug CCC kalabot sa pamahayag ni Sepada apan wala pay tubag sa pagkakaron.

Si MGB-7 OIC, Regional Director Armando L. Malicse ni-issue na og Suspension Order Carmen Copper Corp paghunong una sa operasyon sa tibuok Carmen Pit.

“…to immediately suspend entire Carmen Pit mining operations due to the recent landslide incident,” sumala sa Information Office sa MGB-7.

Ang CCC human sa hitabo temporaryo dayong nipahunong sa ilang mga mining operations aron pagsiguro sa kaluwasan sa mga empleyado ug kontraktor.

Gibasol sa CCC ang sagunson nga pagulan sa niaging mga bulan sa maong hitabo. “And aggravated by Typhoon Vicky which hit part of the Visayas including Toledo City last Friday December 18, 2020,” sumala pa sa pamahayag sa CCC.

Apan si Neil Sanchez, ang pangulo sa Cebu Provincial Disaster Risk Reduction and Management Office miklaro nga dili konektado sa bagyong Vicky ang nahitabo minahan.

“Because eventually when the incident happened which was yesterday gawas naman si Vicky sa PAR (Philippine Area of Responsibility),”sigon ni Sanchez. (BANAT NEWS)