Pag-aspalto sa karsada gisugdan na sa DEPW

Cebu, Philippines — Gilusad dili pa lang dugay sa Kagamhanan sa Siyudad sa Sugbo ang Operation Asphalt Surge diin tumong niini ang pag-ayo sa mga libaong nga kadalanan.

Suma pa ni Mayor Edgar Labella nga nakatampo usab sa libaong nga dalan mao ang kanunay nga pag-uwan.

Sa nasayran pipila sa mga motorista ang nireklamo sa gubaon nga mga karsada.

Nanawagan si Labella sa katawhan nga i-report dayon ang libaong nga mga dalan aron ilaha dayon kini nga maaspalto.

Gisugdan na sa Department of Engineering and Public Works (DEPW) sa miaging adlaw ang subsob nga pag-aspalto sa kadalanan.

Giklaro sa mayor nga bisan usa kini ka national road, andam gihapon moayo ang siyudad niini.

“Dili man nato maato og suroy ang tanang lugar maong nihangyo mi sa katawhan nga i-inform ta kun asa pa nga mga lugar ang angayan pa nga aspaltohon,” saysay pa sa mayor.

Suma pa ni Labella nga nakaalerto kanunay ang mga engineer sa siyudad alang sa pag-ayo sa mga guba nga kadalanan. ( BANAT NEWS)