Clearing operation sa mga sapa gilugwayan

Cebu, Philippines — Tungod og alang sa diwa sa Pasko, gihatagan og lugway sa kagamhanan sa Siyudad sa Sugbo hangtud sa Enero 4 sunod tuig ang mga illegal settlers nga naa nagpuyo sa mga sapa alang sa boluntaryong pagguba sa ilang istruktura.

Adunay kapin sa 100 ka panimalay gikan sa nagkalain-lain nga barangay ang naapil niini.

Gawas sa paghatag ug 15 ka adlaw sa pagdemolish sa ilang istruktura, gihatagan usab ni Mayor Labella og tabang pinansyal ang mga apektadong pamilya.

Matud ni Konsehal Jerry Gaurdo, ang chairman sa committee on infrastructure, nga mismo si Mayor Labella ang naghangyo sa Department of Public Works and Highway nga himuon ang clearing operation sa Enero 4.

Nasayran usab nga ang nanag-iya og panimalay nakadawat P24 mil matag usa.

Ang pagpanghatag sa tabang pinansyal diha sa Plaza Independencia gisaksihan usab ni Bise mayor Michael Rama ug konsehal Donaldo Hontiveros.

Bisan ang mga informal settlers mismo nag-antus usab sa mga pagbaha sa syudad busa nahimo silang malipayon sa maong kalamboan.

Kadaghanan sa mga informal settlers nga misaad nga boluntaryong moguba sa ilang istraktura ug nakadawat usab sa financial assistance naggikan sa Barangay Tinago nga adunay 48 nga panimalay, 22 gikan sa Tejero, 20 gikan sa Pasil ug 18 gikan sa Mambaling.— (BANAT NEWS)