Lapu-Lapu city hospital mahimo na nga secondary hospital
Cebu, Philippines — Mahimo na unya nga usa ka secondary hospital o level 2 ang Lapu-Lapu City Hospital nga gipadagan ubos sa lokal nga kagamhanan.
Subay niini gikalipay ni Lapu-lapu City Mayor Junard Ahong Chan tungod kay maisip kini nga pinaskohan sa mga Oponganon ug makabaton na og tukma nga serbisyo sa tambalanan.
"Ako silang gihangyo nga mahimo ma-fully operational na nato ang Phase 1 ug Phase 2 sulod sa bulan sa Disyembre 2020," ni Mayor Chan pa.
Gitug-an sa mayor nga ang DOH 7 officials mihimo na og inspection sa nagpadayon pa nga civil work sa niadtong Disyembre 15, 2020.
Lakip sa nihimo og inspection mao si Assistant Regional Director Dr. Guy Perez nga maoy Development Management Officer V (DMO) Dr. Maria Soccoro Entera ug Engr. Vincent Michael Bandola, DOH infrastructure Service Unit.
Gitataw ni Chan nga ubos sa maong kategoriya makahatag na og tukma nga serbisyo ang tambalanan ngadto sa mga pasyente lakip na ang pagpahigayon og minor ug major operation.
" Kung ugaling mahuman na ang inspection ug mahimo na kining secondary hospital anaa na usab unya ang Incentive Care Unit (ICU) ug mas mapadako pa nato ang emergency room kon ER," nagkanayon si Mayor Chan.
"Ang mga hospital sa probinsiya sa Sugbo, level 1 ra gyod kutob mao usab ang Dakbayan sa Mandaue ug sa mga highly urbanized nga dakbayan, ang Lapu-Lapu ra ang mahimo unya nga Level 2 Hospital, dugang pa niya. ( BANAT NEWS)
- Latest
