Papa napatay sa anak

Cebu, Philippines — Patay ang usa ka 58-anyos nga amahan, human kini gidunggab sa iyang anak atol sa ilang mainiton nga lalis sa may Sitio Panas, Barangay Poog, Toledo City, alas-9 sa gabii adlaw nga Domingo.

Ang biktima mao si Robert Nadela, residente sa maong lugar, samtang ang suspetsado ang anak niini nga Rodel Nadela, 34, adunay kapuyo ug silingan sa maong biktima.

Matud pa sa initial nga imbestigasyon nga gihimo nila ni Police Staff Sergeant Jonever Manabat giingong nagkalalis ang biktima ug anak niini sa wala pa matino nga hinungdan nga niresulta sa pagpanunggab ni Robert ngadto sa iyang amahan.

Sumala pa ni Manabat, suway pa ni uwang ni Lourdes Nadela, 62, sa away sa iyang bana ug anak apan ang anak nga naghupot ug kutsilyo ang nidunggab sa iyang amahan sa makadaghan nga higayon.

Dali pa unta nga gidala sa tambalan ang amahan apan gideklarar kini nga dead on arrival.

Ang inahan sa suspek ang nalandig usab sa tambalanan human kini nakaangkon usab ug samad sa tungod sa iyang pag-uwang-uwang sa away.

Ang suspek dali ra usab nasikop sa mga tinugyanan sa DAS Police Community Precinct 1 human sa insidente ug lakip ang nasakmit ang kutsilyo nga gigamit niini nga adunay 10 inches nga gitas-on.

Ang kapulisan sa Toledo, padayon pa karon nihimo og imbestigasyon may kalabutan sa hinungdan sa ilang mainiton nga lalis lakip usab ang pag-andam sa pagpasang-at ug tukma nga kaso.

Adunay mga hungihong nga giingong tungod sa cellphone ang hinungdan sa ilang away apan padayon pa hinuon kini susihon sa kapulisan. ( BANAT NEWS)