‘Arestoguinaldo’ gilusad sa kapolisan aron paghatag og pinaskohan

Cebu, Philippines — Sagol ang gibati sa mga tawo nga maoy nakadawat og sayong pinaskuhan gikan sa Cebu City Police Office atol sa ilang paglusad sa ilang programa nga gitawag og “Arrestoguinaldo”.

Kini tungod kay sa dili pa sila hatagan og pinaskuhan pasabton una sila kun nganong gipangita sila, kun unsay ilang sala nga nahimo ug dayon paadtuon sa patrol aron kunuhay didto pasakyon apan diay sugaton sila og Christmas song sa mga police. Ang mga nakadawat og pinaskuhan gipangkulbaan ug gani dunay uban nakahilak sanglit wala gyud sila’y ideya sa nahitabo.

Nagkanayon si CCPO Director Police Colonel Josefino Ligan nga walo ka mga establisamento ang ilang gipilian ug nagpahigayon sila og profiling kun kinsa ang mga staffs ang angayan hatagan, kini pinaagi sab sa pakig-alayon nila sa management sa establishment.

“Mga establishment, sa mga checkpoints naa gihapon. Naay tay napilian nga hospitals, Department stores and food restaurants”, sigon ni Col. Ligan.

Gihimug-atan ni Col. Ligan nga gihimo nila kini aron sab sa pagpaambit sa ilang grasya nga nadawat ilabi na karong panahon sa Pasko.

“In the spirit og Christmas, on the side sa kapulisan naa pud ta ana, ato pud igahin unsay nadawat nga grasya manghatag pud ta kay ma Pobre o dato basta Christmas wala na siya, tanan malipayon, makahatag lang ta gamay kaayo nga butang dako na kaayo og kalipay sa usa ka tawo.”

Gawas sa pinaskuhan nga ihatag sa PNP, ang management usab sa mga establisamento mohatag og pinaskuhan sa ilang mga staffs nga maoy napili. (BANAT NEWS)