Amerkanong sex offender gidakop

Cebu, Philippines — Gisikop sa mga otoridad ang usa ka 55-anyos nga Amerikanong pugante nga giingong sex offender didto sa lungsod sa Ginatilan  niadtong Huwebes, Disyembre 10, 2020.

Ang suspek giila nga si Donald Robert Tyler, gidakop kini sa hiniusang operasyon nga gihimo sa National Bureau of Investigation (NBI) - Central Visayas ug Bureau of Immigration (BI) diha sa iyang balay sa Barangay San Roque sa nahisgutang lungsod.

Matud ni Maria Contessa Lastimoso, special investigator ug liaison sa NBI - Central Visayas, pinaagi sa usa ka press release, si Tyler mao ang subject sa usa ka warrant of arrest nga gi-isyu sa Circuit Court sa State of Oregon kaniadtong Nobiyembre 4, 2019 alang sa sodomy sa first degree.

Sumala sa oregonlaws.org, ang sodomy sa first degree usa ka Class A nga kalapasan. Giingon niini nga nakalapas ang usa ka tawo sa sodomy sa first degree kun menor de edad, kadugo sa suspek ang biktima o may kakulian sa pangisip.

Si Tyler gikatahong mi-ikyas gikan sa Amerika atol sa pag-isyu sa usa ka warrant of arrest batok kaniya ug niabot sa Pilipinas kaniadtong Nobyembre 9, 2019 pinaagi sa Bangkok sa Thailand ug gikan didto milarga kini padulong sa Sugbo.

Si Lastimoso miingon nga ang US Department of State, Diplomatic of Service, Office of the Overseas Criminal Investigation (OCI) sa Embahada sa Manila pinaagi sa US Attache nga si Michelle Michaud nangayo og tabang sa NBI- Central Visayas pagpangita kang Tyler.

Nasayran nga adunay kapuyo si Tyler sa lungsod sa Ginatilan diin siya nagpuyo. Anaa na siya karon sa kustodiya sa BI.

Ang gobiyerno sa Estados Unidos naghangyo sa BI og warrant of deportation tungod kay wala’y balidong pasaporte sa US ang suspek dihang gikanselar kini sa ilang gobiyerno  tungod sa iyang salaod. –Mae Fhel Gom-os/IBM
Kapolisan nipasidaan batok sa mga illegal nga nanghimo og pabuto

Giawhag  sa kapolisan ang mga molupyo sa Barangay  Babag,  Dakbayan sa Lapu-Lapu pagsumbong kun dunay illegal nga namuhat og pabuto sa ilang dapit gumikan kay gibutang nila sa risgo ang kinabuhi ug kabtangan sa ilang komunidad.

Ang maong awhag giluwatan human sa pag-ulbo sa panimalay sa pamilyang Dico sa Purok  Shooting Star  sa Sitio Babag 2 sa Barangay Babag nga mikalas 13 anyos nga batang lalaki ug miangol sa inahan ug kamagulangan nga anak niining babaye.  Si Police Senior Executive Master Sergeant Rene Bentulan nga maoy nangulo sa Explosive Section sa Police Regional Office (PRO) 7 miingon nga tulo lang ka mga manufacturer og firecrackers ang legal nga namuhat og pabuto sa Barangay Babag.

Ang buhatan sa Bureau of Fire Protection (BFP) sa maong dakbayan nagrekorida pagpahimangno batok sa ilegal nga pagpamuhat og paboto.

Hinuon si Babag Barangay Kapitan Arsenio Berdin miingon nga wa sila magkulang pagpahimangno sa mga namuhat og paboto sa ilang dapit. ( BANAT NEWS)