Pasko – Panahon sa Gugma

CEBU, Philippines —cApan, kun pamalandungan, ang Pasko nagkahulogan og gugma—di hitupngang gugma—sa atong Langitnong Amahan pinaagi sa paghatag kanato sa Iyang Anak aron kita maluwas gikan sa mga sala.

Subo lang, murag ang konsepto sa tawo bahin sa gugma sobra ra kaayo sa romansa kay para nila ang gugma mao ang atraksyon tali sa babaye ug lalaki—o kadtong duha ka tawong naumpang dili mabuhi ang usa kun wala ang usa. Duna pa gyuy uban nga ang emosyon sa ilang gugma base lang sa pakighilawas o biga. Gikalimtan na kun unsay tinuod nga kahulogan sa gugma.

Ang romansa, sekswal nga atraksyon mabaw ra kaayo, taphaw nga pagpakita og tinuod nga gugma. Icing lang kini sa cake, sa tinud-anay lang. Ang uban ang icing ray kan-on kay ipadaplin ang cake. Mao kini ang kasagarang pagtan-aw karon sa uban bahin sa gugma.

Apan kaning romantikong gugma way kasigurohan; bisan gani ang pagpakita og gugma ngadto sa pares dili pa gyud baya paigo. Mao nga kinahanglan gyud dulot-bukog ang ilang kahulogan sa gugma, aron kun magkadeperensya ang emosyon tali sa duha, magpabiling lig-on ang ilang relasyon. Mao bitaw nga kaning magminyo duna gyuy kasabotan nga pirmahan nga gitawag og “marriage contract.”

Kani nga kontrata praktikal kaayo. Kun mobahar na ang emosyon, dili basta lang mamutos ang usa unya biyaan ang iyang giminyoan—tungod kay duna man silay pinirmahang kasabotan nga magunongay “for better or for worse, in sickness and in health.” Ang mga panaad pinaagi sa pulong dili gyud paigo; nagkinahanglan pa gyud og kontrata.

Normal na nga magkaanak ang managtiayon, ang marriage contract naghatag og kasiguroan nga ang bana ug ang asawa mosuporta ug mogiya sa ilang mga anak.

Ang mga ginikanan dunay moral nga kaakohan ngadto sa ilang mga anak aron sila mamahimong matarong ug responsableng miyembro sa komunidad.

Nagpasabot kini nga wa sa plano sa Ginoo nga mapuno ang kalibotan og mga way ayo, mga criminal, badlungon sa dihang Iyang gihimo ang tawo aron mosanay.

Maayo nalang, ang lig-ong relasyon tali sa mga miyembro sa usa ka pamilya dili lamang kadtoy kinatibuk-ang konsepto sa gugma. Tungod kay dunay mas dakong pamilya—ang tibuok katawhan us aka dakong banay. Ang tanan anak sa Diyos, ang mga ginikanan gitahasan nga siguraduhong ang ilang mga anak modako nga tinud-anay nga repleksyon sa Magbubuhat.

Ang pamatasan, tingali, kinahanglang ang tanang tawo motan-aw sa ikaayo sa uban ug ilang responsibilidad ang usa’g-usa aron matarong. Pinaagi niini, way manglupig o manaug-daog kay magpasulabi ang pagkamanggiluluy-on ug mopatigbabaw kini sa tawo.

Kun ang pamilya mangimbitar og bata aron pakan-on sa ilang salin sa lamesa, mas maayo pa ni nungka ilabay ang pagkaon sa basurahan. Apan kun ang pamilya pamilya manawag og kabus nga bata aron mosalo sa ilang pagkaon, usa kini ka buhat sa pagkamaayong tawo. Mas maayo pa gyud kun sagupon ang bata—isip usa kanila, aron makatilaw sab siya sa kun unsay anaa ninyo – aning paagihas, mas makahuloganon ang imong nahimo; mura kini og tinuod nga paghigugma.

Duna pa gyuy mas labaw nga konsepto sa gugma, kanang mosakripisyo para sa uban. Sumala pa sa kasulatan: “He who puts himself first shall be last; and whoever puts himself last shall be first.” Saksi ang tawo sa gihimo sa Anak sa Diyos kinsa mikanaog sa kalibotan sa ngalan sa gugma ug midalit sa Iyang kinabuhi aron masalbar ang tawo sa mga sala. Way makatupong ani nga gugma.

Tingali kung itanom sa tanan sa ilang mga kasing-kasing ang klase sa gugma nga naa sa Ginoo, wa gyuy tawong tumban sa uban. Kay sa pagkatinuod, mura lang kita og abog sa buhat sa Ginoo apan wala kita pasagdi kay kita maoy Iyang kinanindotang binuhat. Nagtuo ko nga kani nga panag-ingnan gyud maoy kinahanglan natong buhaton – to treat one another as equals, no more, no less.

Kun atoa kining mabuhat, nan, molungtad kining Pasko hangtud sa hangtud dili lang kutob sa buwan sa Disyembre… kondili, kada adlaw sa tanang katuigan!- IBM ( BANAT NEWS)