Ad Hoc committee umolon aron tabangan si Labella
Cebu, Philippines — Gitinguha karon ni Bise Mayor Michael Rama ang pag-umol og ad hoc committee aron moabag sa mayor sa pag- “refocus” ug pag- streamline sa budget ug tabangan kini sa pagpangita og tinubdan nga kakuhaan alang sa priority projects niini.
Matud ni Rama nga sa pagkakaton, mas angay hatagan og prayoridad ang mga programa alang sa pandemya , flood, food production ug uban pa nga social concerns.
Sumala pa sa bise mayor nga malakip siya sa maong komitiba kauban sila si Konsehal Phillip Zafra, Edu Rama, Raymond Garcia, Lea Japson ,Nestor Archival , ABC President Franklyn Ong ug Alvin Dizon.
Nagkanayon ang bise mayor nga isip pinili sa katawhan importante kaayo nga magtinabangay ang mga opisyales busa nanawagan siya sa kaubanan nga tabangan ang mayor.
“So it is our duty and obligation to help him. As friends, as colleagues, and most importantly, as officials accountable to our people. Let us help the mayor keep his people accountable. Let us help the mayor keep his people responsible,” suma pa ni Rama.
Una na nga gipadayag sa pipila ka mga konsehal nga sa P10.8 billion nga gi-propose nga budget alang sa 2021 nga kinahanglan ang lapad nga tukion og maayo ang mga programang gahinan niini, ug kinahanglang adto kini gamiton sa mga naapektohan sa pandemya. Nagkanayon ang mayor nga kun duna man gani laing kinahanglanon, aduna ray supplemental budget.
Nagkanayon si Rama nga siguraduhon sa maong komitiba nga makaumol og budget nga kaya nilang maesplikar sa katawhan.
Gitataw ni Rama nga labing maayo nga mangita of laing tinubdan sa budget nga dili mahilabtan ang halin sa South Road Properties.
Atol sa privilege speech ni Rama sa session sa konseho, gipadayag niya kun unsa ka importante ang pagmentinar sa pagsalig tawo. (BANAT NEWS)
- Latest
