Magmabinantayon sa tanang panahon

Cebu, Philippines — Karong adlawa, atong dagkotan ang ikaduhang Purple Advent Candle sa pagpadayon sa atong preparasyon sa dalan sa atong Manluluwas. Ang kandila pagpahinumdom kini kanato nga sugaton kining panahona sa tinud-anay niini nga kahulogan, ang pagabot sa Messiah, magpanikad sa kalipay pagsugat sa pagkatawo ni Kristo bisan pa man aning bagyong atong gisagubang, kining kalibotanong pandemiya dala aning makamatay nga coronavirus.

Bag-ohay lang nato gisaulog ang Bag-ong Tuig sa Simbahang Romano Katoliko. Gipahinumdoman kita nga mag-ampo pa gyud ug kining atong pag-ampo kinahanglang nahasubay sa liturgical season. Panahon sa Season of Advent, atong balikan og lantaw ang panahon diin ang Ginoo nagpuyo uban kanato duha ka libo ka tuig na ang nakalabay didto sa Bethlehem. Kinahanglang ato kining tan-awon uban sa pagpasalamat ug kasadya, selebrasyon kini sa nahitabo kaniadto sa dihang kita naluwas.

Ang Advent o Adbiyento nagpasabot sab pagpanagana sa pagbalik sa Ginoo, way nasayod kanato kun kanus-a.

Ang importante, magmabinantayon kini kanunay sa tanang panahon. Kinahanglang alerto ta kay wala kita nasayod kun kanus-a manuktok sa atong pultahan ang Ginoo. Gipahinumdoman sab kita sa Adbiyento nga dili nato kinahanglang mahalon ang mga kalibotanong butang.

Kinahanglang atong saulogon ang atong kagawasan isip matinumanong alagad sa Diyos, kay kita bukas sa pagpadayag sa atong pagtuo ug dakong utang kabubut-on sa tanang paagi.

Ug kini atong mabuhat kun giunsa nato pagtratar ang mga kabus ug mga masakiton, sa mga tawong nagping-it sa kasakit, gigutom, ug giuhaw. Makita unta nato gikan sa ilang mga mata si Kristo.

Ang atong kinabuhi dinhi sa kalibotan dili importante sanglit lumalabay lamang kita. Bation kita og kakapoy, kabalaka ug maugtas mao nga nagkinahanglan kita og pagkaon aron mobaskog atong lawas aron makasustinir. Isip magtutuo, nakasinati kita og mga pagsuway, dunay mga panahon nga kita mahiubos. Apan ang Gospel nag-ingon, ang Ginoo naa kanato kanunay.

Ang Ginoo maoy maghatag sa atong pisikal ug spiritual nga pagkaon. Gitawag sab kita aron amumahon ang atong espirituhanong kinabuhi pinaagi sa pag-ampo alang sa Iyang gugma ug kaluoy. Sa ato pa, gihagit kita aron magmagiluluy-on ug manggihatagon—aron mahimo kitang “blessing” para sa uban.

Kada adlaw atong gidawat ang grasya sa Ginoo sa maayong panglawas, ato sab unta kining ipaambit sa uban pinaagi sa atong nahibaw-an … tingali bisan nalang sa paagi pagsunod sa gimando nga health and safety protocols aron mahunong na kining pagpanakod sa Covid-19..

Molig-on pa gyud unta ang atong pagtuo ug saulogon kining gasa nga mao ang presensiya sa Ginoo –  ug unta tungod niini mamahimo kitang mas manggiluluy-on ug mopanindot sa atong panaw padung sa walay kataposang kinabuhi — IBM ( BANAT NEWS)