FISECA gubaon og opisina

CEBU, Philippines — Ang mga sakop sa Fisheries Sea Ecological Care (FISECA) giingong nag-antos sulod na sa 30 ka tuig sa gubaon nga bongbong ug busloton nga atop sa ilang buhatan nga nahimutang diha sa Barangay Cansojong, Dakbayan sa Talisay

Nabantayan nga tayaon na kaayo ang atop nga sin sa buhatan sa FISECA ug nangaguba na ang bongbong niini.

Si Allan Villarias Sr. sa FISECA nibutyag nga ilaha nang gihangyo ang Barangay Cansojong sa mao nilang problema diin napaabot  usab kini ngadto kang Konsehal Joho Bacaltos, chairman sa committee on environment sa nahisgutang barangay.

Ang FISECA mao kini ang magbantay sa kadagatan sa siyudad batok sa mga ilegal nga kalihokan.

Nasayran nga sulod na sa tulo ka dekada o 30 ka tuig ang buhatan sa FISECA o gitawag nila nga bunkhouse diin hangtud karon wala kini mahatagi sa pagtagad o walay kausaban.

Giingong panahon sa ting-uwan ang mga sakop sa FISECA mag-iyahay kini og pahikling pangita og lugar diha sa ilang buhatan aron dili mabasa  tungod kay magtulo man kini.

Ang mga sakop sa FISECA nanghinaot nga unta mahatagan sila og pagtagad aron usab hapsay ang ilang pagpahigayon sa ilang trabaho. –BDB (BANATNEWS)