Pooled swab testing sa TPUJ drivers gipadayon

CEBU, Philippines — Gipadayon kagahapong adlawa ang naoktabang swab-testing sa  unang batch sa mga drayber sa  tradisyonal nga  PUJs apan ning tungora pinaagi na sa pooled testing subay sa guidelines nga gipasunod sa Department of Health-7.

Human mogawas ang resulta ug kun pasado sa road worthiness ug sakto sa health and safety inspection hayan makasugod na pamasahero ang uban karong Huwebes sa hapon.

Si Cebu City Councilor James Cuenco kinsa pangulo sa task force Balik Pasada Program sa siyudad miingon nga anamon lang ang pagpabalik sa mga TPUJs ug mag-agad kining tanan sa resulta sa lapad nga screening.

Subling gipahimagnoan sa kagamhanan ang mga drayber nga siguradohong makatuman sila sa minimum health protocols sa ilang pagpamasahero sama sa pagsuot nila ug sa tanang pasahero og face mask  ug face shields  ug pagtuman sa social distancing. Nagtinguha ang task force nga makabalik ang 1,355 ka TPUJs apan anam-anamon lang.

Wa pay siguro

Apan wala pay kasiguradohan kun kanus-a gyud makasugod og balik pamasahero ang mga TPUJs human ang Land Transportation Franchising and Regulatory Board (LTFRB)-7 mipahibalo kagahapon nga kinahanglan pang motukod og one-stop-shop ang siyudad aron didto ang mga jeepneys inspeksyonon.

Subay sa kamandoan, walay TPUJs nga tugotang makabiyahe kun walay pagtugot o special permit to operate nga giisyu sa LTFRB nga ihatag kung makapasar sa inspeksyon ang mga sakyanan.“Dili pa gyud na makabalik ang traditional jeepneys sa Cebu City kay wala pa man naka-set-up og one-stop-shop. Unya karon, istrikto na pud ang border controls sa Cebu City. Naa pud mga drivers nga gipang swab test nga positive sa COVID-19,” matud pang LTFRB-7 Director Eduardo Montealto. Sa siyudad sa Talisay nakabalik na ang ilang TPUJs human ang siyudad nakabutang og one –stop-shop ug bisan onse sa mga driver nila ang nagpositibo sa Covid-19. Samtang ang Mandaue City ug Lapu-Lapu City gikatakda pa sab magtukod og one-stop-shop karong adlawa ug sa adlaw nga Miyerkules samtang ang Cebu City wala pay gihatag nga schedule kun kanus-a iestablisar ang ilang one-stop-shop sumala pang Montealto.

Buses balik probinsya

Giangkon ni Montealto karong nagkadaghan ng mga balay patigayon ang nangabli, magkinahanglan gyud og mas daghang pasaheroan nga masakyan tungod kay kani tanang mga bus nga nagdagan sa Cebu City, Mandaue City, Lapu-Lapu City, ug  Talisay City pabalikon na og biyahe sa probinsya. Sa pagkakaron, adunay 172 Ceres buses nga nagdagan apan nabalda nunot sa mga aksidenteng nahitabo ug ang mga drayber gipaubos sa  defensive driving seminar ug drug test. –The Freeman/IBM