Dugang rota gipangayo sa transport group

CEBU, Philippines — Nanawagan ang sektor sa transportasyon sa Siyudad sa Sugbo nga unta mahatagan og patas nga gidaghanon  sa PUJ units matag operator kun pananglitan makadagan na sila pagusab.

Sumala pa sa usa sa mga sakop sa board sa Cebu Integrated Transport Service Multi-purpose Cooperative (CITRASCO) nga si Clifford Niñal nga mao nalang kini ang pamaagi nga makahatag og kaayohan sa mga drayber sa tradisyonal PUJ’s kun pananglitan madayon gyud ang pagbanhaw sa ilang operasyon.

Una na nga nialma si Niñal sa pasiunang ebalwasyon nga nag-ingong posibleng usa ka libo ra ka units sa PUJs ang makabiyahe og balik.

Nasayran nga dunay kapin sa lima ka libo nga PUJ nga nagbiyahi sa siyudad. Apan subay sa modernisasyon sa transportasyon nga dugay ng wala mapatuman, ang mga kagang-kagang ug lapas 15 ka tuig nga mga PUJs di na tugotang makabiyahe.

Gitug-an ni Niñal nga duna gyu’y ubang  operators ang nibaligya nalang sa ubang sakyanan aro mahaw-as sa kalisod.

Kapin na sa unom ka buwan nga wala kabiyahe ang mga tradisyonal nga PUJ’s tungod sa pademya.

“Bitaw, luoy na kaayo ang atong nga drayber , wala na kahibaw kun asa na sila mangita og kan-onon para sa ilang pamilya,” matud pa ni Niñal kinsa kapitan sa San Nicolas Proper.

Giangkon niya nga wala siya mahimuot sa pagdagsa sa dagkong bus sa kadalanan sa dakbayan nga alang kaniya nakapasamot sa  problema sa trapiko sa mga gagmay nga dalan. Ang maong mga bus maoy nagsilbing transportasyon sa mga essential workers ug frontliners atol sa quarantine ug hangtud gipaluagan ang retriksyon ug gitugot na ang pagpamasahero.

Gawas sa pandemya , usa sa  dakong  hagit nga giatubang sa mga drayber sa PUJ mao ang  taud-taod na nga plano nga Cebu Bus Rapid Transit System sa Metro Cebu.

Sayo pa , gipadayag ni Niñal nga magbukas unta og bag-ong mga rota ang gobiyerno alang sa mga PUJ sa higayon nga masugdan na ang maog sistema. /IBM (BANATNEWS)