Baha sa Mambaling underpass wa pa masulbad

CEBU, Philippines — Gusto ni Kong. Rodrigo “Bebot” Abellanosa sa South District nga paesplikahon ang Department of Public Works and Highways (DPWH) atol sa executive session nga gipatawag sa Cebu City Council ang kabahin sa grabeng pagbaha ug uban pa may kalabotan sa kontrobersyal nga Mambaling underpass.

Pipila sa mga miyembro sa Konseho naglaum nga mao na kini ang kataposang higayon nga mopatawag sila og executive session uban sa DPWH bahin sa maong problema ug matubag ang dugay na nilang mga pangutana.

Niadtong Miyekules, atol sa sesyon sa Konseho gipadayag ni Konsehal Jerry Guardo sa iyang privilege speech ang nahitabong paglunod sa tubig-baha diha sa Mambaling-Basak San Nicolas underpass nga nag viral sa social media.

“As chairman of the Committee of Infrastructure, I was saddened with what I saw and the present dilemma of flooding. Momentarily, I can just only empathize with our residents, pedestrians and motorists in the area for the inconvenience it causes them and the bad image that it portrays to our beloved Cebu City in the international scene,” matud ni Guardo sa iyang speech.

Dili lang kadto maoy unang higayon nga gibahaan ang maong tunnel ug ang mga barangay palibot niini tungod sa pagbunok sa uwan.

Sumala pa sa mga report pipila ka buwan human gibuksan ang tunnel, si Abellanosa nagpangutana bahin sa maong baha sa lugar apan hangtud karon wa pa gihapon masulbad.

Pipila sa mga residente miingon nga nakabantay ra sila nga dunay taga DPWH nga nisusi sa lugar human nga dunay netizen nga nihatag og hulagway sa The Freeman bahin sa baha diha sa tunnel nga gi-post kini sa social media sa pamantalaan.— The Freeman/IBM