Pagbukas sa turismo planohon og mayo

CEBU, Philippines — Konseho sa Dakbayan sa Sugbo ang motuki na sa pagpangandam sa hinay-hinay na nga pagbukas sa turismo.

Sa resolusyon nga giduso ni Konsehal Alvin Dizon , giawhag niya ang  Cebu City Tourism Office nga moduso og lapad nga plano kalabot niini sanglit usa kini sa mga unod sa recovery program sa ekonomiya sa sa dakbayan.

Makigpulong usab ang konseho sa pipila ka mga negosyante aron paminawon ang naistablisar nila nga mga plano sa hinay-hinay nga pagbanhaw sa ekonomiya.

“Daghan gyud og nawad-an og trabaho  panahon sa pandemya, maong hinay-hinay ta sa pagtoun sa konkreto nga plano sa hinay-hinay nga pagbukas sa turismo industry sa City,” suma pa ni Dizon nga nahinabi sa Banat News kagahapon.

Gawas sa pagpreserbar sa kultura, nailhan usab ang dakbayan  sa Sugbo nga dunay nindot nga  mga talan-awon  ilabi na sa mga bukirang barangay. Kahinumdoman nga gibuksan  na usab sa miaging buwan ang Fort San Pedro.

Sa pikas bahin, dili lang ang Cebu City maoy naninguhang makabangon ang turismo, ang dakbayan sa Lapu-Lapu inabagan sa mga hotels ug mga resorts nagtinguhang makabangon sab sugod karong Oktubre 17, 2020.

Si Mayor Junard “Ahong” Chan miingon nga plano sa mga hotels ug resorts sa dakbayan nga mohatag og 5 porsiyentong diskuwento.

Ipahibalo kini atol sa ilusad nga trade fair nga pangulohan sa Tourism, Cultural, and Historical Affairs Commission (TCHAC) nunot usab  sa paglusad sa  “Balik Turismo” sa  Okober 17  diha sa Hoops Dome sa Barangay Gun –ob.

Ang mga  senior citizens ug minors matud sa mayor malakip na sa guest package kun matugotan sa Department of the Interior and Local government ug sa Department of Tourism. —Romeo T. Limpangog/IBM (BANATNEWS)