Kaso sa Cebu City kalit nisaka, 12 kanila taga bangko

CEBU, Philippines — Nakatala og kalit nga pagsaka sa mga bag-ong kaso sa Covid-19 ang Cebu City base sa gipagawas nga datus sa Department of Health Central Visayas niadtong Septiyembre 9,2020. Ang siyudad giingong adunay natala nga 39 ka mga bag-ong nagpositibo sa maong sakit, dako kining pagsaka sa gidaghanon kun itandi sa nangaging duha ka mga adlaw.

Matud ni Konsehal Joel Garganera, ang Deputy Chief Implementer sa Emergency Operation Center nga gikahinabi sa mga tigbalita kaning maong mga kaso nagagikan sa 18 ka mga barangay sa siyudad gikan sa 1,006 ka mga tawong nagpaubos sa swab test nga diin kwatro porsiyento ang nagpositibo.

“But just the same, wala ko malipay ani. The more na, this is a message to all of us, especially the business establishment karon na they have to mitigate the risk in opening, in running their businesses karon,” matud ni Garganera. Sumala pa sa konsehal, ang pagtakod sa maong sakit gikan sa gawas sa panimalay misaka og 65 porsiyento niadtong adlaw nga Miyerkules. Sa 39 ka bag-ong napositibo, ang napulo niini gikan sa Brgy. Apas, 12 ka kawani sa usa ka bangko ug pito ka mga locally stranded individuals (LSIs) ug uban pa.

“Karon bangko is one of the essential establishment. I believe they should devise or think of something na not only to protect their clients but also their employees aron dili sad maputol pud ang ilang serbisyo,” dugang pa sa konsehal.

Ang maong bangko gipaubos na sa lockdown hasta ang gipuy-an sa mga trabahanteng nagpositibo ug silang tanan gibutang sa isolation samtang kadtong mga LSIs gipaubos sa quarantine. Matud niya, kaning 39 ilang nakompleto og kuha pinaagi sa contact tracing kagahapong adlawa. “Mao man gyud ni ang among gikuyawan, matud pa sa World Health Organization, the first two weeks when a particular LGU downgraded its quarantine status, mo-experience gyud ‘ta og spike,” matud ni Garganera.

Nagtuo si Garganera nga dako ang posibilidad nga mosaka pa gyud kining mga kaso sa mosunod nga mga adlaw. “Expect gyud nga cases will rise because from experience, og naa gani usa ka individual nagpositive sa usa ka balay bisan pa’g naextract na na siya, the exposure sa mga family members or household members diha to that particular positive individual, naa na. When you talk about niani, dako gyud kaayo’g posibilidad nga mosaka pud ni siya once the result of those that have been swabbed sa first generation mogawas na,” pasidaan ni Garganera.

“Based on the result karon, the tendency is it’s gonna rise. I just hope and pray nga nadali to sila nato pag-extract, na wala kaayo sila maka-transmit,” dugang pa niya.  Sa pikas bahin, 95 ka bag-ong kaso sa Covid-19 ang natala sa sa tibuok Central Visayas niadtong Septiyembre 9,2020 sumala pa sa Department of Health (DOH-7).

Gawas sa natala sa Cebu City, pito ang sa Lapu-Lapu, 18 sa Mandaue ug 32 sa Probinsya sa Sugbo.   Ang active cases sa Covid-19 sa rehiyon  anaa sa 1, 628. Mas daghan niini ang recoveries nga anaa na sa 16, 668 human 161 ang nadugang sa mga naayo. Ang cumulative case sa Covid-19 sa Central Visayas anaa sa 19, 492 ug 1, 196 ang namatay. Rowena D. Capistrano, Le  Phyllis  Antojado/IBM (BANATNEWS)