PENRO mosusi sa quarry site sa Alcoy

CEBU, Philippines — Mopahigayon og aerial survey karong adlawa ang Provincial Environment and Natural Resources (PENRO) didto sa mining site sa Alcoy subay sa kamandoan ni Cebu Governor Gwendolyn Garcia kalabot niining isyu sa ‘dolomite sand’ nga maoy gipangbudbod sa baybayon sa Manila Bay. Matud ni Rodel Bontuyan ang hepe sa PENRO nga usa ka team ang moadto didto nga langkoban sa civil engineer, geodetic engineer, mining engineer ug personnel sa PENRO.  “Ipa-inspect kung compliant ba sila sa terms and conditions nila sa ilang mineral production with the government,” matud ni Bontuyan.  Si Garcia niluwat og cease and desist order batok sa Dolomite Mining Corporation (DMC) ug Philippine Mining Services Corporation sa pag-extract ug pagpadala sa dolomites padulong sa Manila Bay. Ang Mines and Geosciencses Bureau (MGB-7) giingong maoy ni-issue og ore transport permit (OTP) ngadto sa PMSC aron madala ang dolomites didto sa Manila.

Matud ni Bontuyan, aduna pay 3,500 metriko toneladang dolomite nga gikuhaan og permit sa PMSC aron dad-on sa kaulohan apan gipugngan una. Gikonsiderar nga large scale mining firm ang DMC ug PMSC ug ang MGB ra maoy makahatag og pagtugot nga sila maka-operate. “Dili man ni permit issuance, it’s about asserting the right of the province invoking the general welfare clause. So mao na ang gibasehan para motan-aw ta kay within the Cebu Province man gihapon ni siya nga area,” pagpasabot pa ni Bontuyan. /IBM (BANATNEWS)