Ferro na-promote gibalhin sa Luzon

CEBU, Philippines — Gibalhin na sa laing lugar si PRO-7 director Police Brigadier General Albert Ignatius Ferro nga makonsiderar nga usa ka promosyon ug siya hulipan ni Police Brigadier General Jonnel Estomo  sugod karong adlawa.

Si Ferro  madestino sa Directorate for Integrated Police Operation sa Southern Luzon. Si Estomo gikan sa Camp Crame ug miyembro sa PNPA Class 92'  ug ang kataposan niyang assignment mao ang Anti-Kidnapping Group.

Si Ferro milingkod sa PRO-7 niadtong Pebrero 6 ning tuiga.

"Naay movement unya ako maoy gi offer-ran na ma assign as acting Director sa Integrated Police Operation for Southern Luzon so it's a two-star position so gisaka ko nila ani nga assignment," matud pang Ferro sa mga tigbalita kagahapong adlawa.

Miangkon siya nga nakurat siya niini, apan nakasabot siya nga normal lang kini ilabi na kun bag-o na ilang pangulo. Ang gipasabot ni Ferro mao si Police Lt. Gen. Camilo Cascolan kinsa gitudlo ni Presidente Rodrigo Roa Duterte nga pangulohan ang Philippine National Police niadtong Septiyembre 2,2020.

Hinuon gihulagway ni Ferro natagbaw siya sa iyang pito ka bulang paglingkod sa PRO-7 ilabi na nga natunong kini sa panahon sa pandemiya.

Malaumon siya nga mapadayon sa bag-ong director ang mga maayong programang iyang nabuhat dinhi. Sa pito ka bulan niyang serbisyo sa PRO-7 mokabat sa P414 milyones nga shabu ang ilang nasakmit. Sa pikas bahin, si Cebu City Mayor Edgardo Labella nasubo sa pagbalhin kang Ferro kay matud niya epektibo kaayo ang heneral ilabi na nga dako kini og papel kun nganong nakab-ot ang “flattening of the curve” sa kaso sa COVID-19 sa siyudad.

“He has been very effective, he has been very intense and he is been very cooperative, we had many good plans together and infact I’d listen to him especially on matters of security and matters of fighting out against those mga abusive people who do not want to comply with minimum health requirements, dako kaayo og natabang si General Ferro,” ni Labella pa.

Hinuon gikalipay sa mayor nga ang pagbalhin ni Ferro makapasaka sa karera niini nga matud niini angayan para sa heneral. Decemay P. Padilla/IBM (BANATNEWS)