Oponganon gipahimangnoan

CEBU, Philippines — Gihangop ni Mayor Junard Ahong Chan ang pagpaubos na ngadto sa modified general community quarantine sa Dakbayan sa Lapu-Lapu sugod kagahapon.

Apan gipahimangnoan niya ang mga Oponganon nga padayon ang pag-amping ug motuman sa mga protocol paglikay sa COVID-19.

Kini iyang gidayag diha sa iyang facebook page human sa pagpahibalo sa Malacañang niadtong Lunes nga ang  mga highly urbanized city nga naglakip sa Lapu-Lapu,  Mandaue, Cebu City, mga lungsod sa Consolacion, Minglanilla ug Dakbayan sa  Talisay nga gipaubos na kini ngadto MGCQ  sugod sa Septiyembre 1, 2020.

Giklaro ni Chan nga higpit gihapon nga ipatuman ang mga health protocol ug ang mga mogawas sa ilang panimalay kinahanglan gihapon kining magdala og QP.

Cordova nilibkas sa border restriction

Gilibkas na sa Lungsod sa Cordova ang border restriction niini tali sa Dakbayan sa  Lapu-Lapu human nga napaubos na ang siyudad ngadto sa MGCQ.

"We are lifting our borders today (Septembre 1, 2020)", matud ni Cordova Mayor Mary Therese Sitoy-Cho atol sa flag raising sa munisipyo kagahapon.

Apan magpabilin ang checkpoint sa pagsusi sa mga pasahero ug PUVs kon nisunod ba sa health protocols sama sa pagsul-ob og face masks, face shield, physical distancing ug uban pa.

Daghang establisamento mobukas

Gilaumang daghang establisamento ang magbukas sa Lungsod sa Consolacion human nga naapil kini sa pagka-downgrade ngadto sa MGCQ.

Si Mayor Joannes Alegado nagkanayon nga moluwat siya og Executive Order aron magiyahan ang mga establisamento sa mga angay nga ipatuman nga protocols.

Samtang magpabilin gihapon nga ipatuman ang work travel pass ug quarantine pass sa lungsod ug magpadayon usab ang scheduling sa pag-adto sa merkado.

Pamaagi kini sa LGU aron malikayan nga mosaka pagbalik ang kaso sa COVID-19 sa lungsod.

I-adopt usab sa Consolacion ang executive order sa Probinsiya sa Sugbo nga naglatid sa guidelines ug protocols nga ipatuman ubos sa MGCQ.

Talisay walay kompiyansa

Si Mayor Gerald Anthony “Samsam” Gullas Jr. sa Dakbayan sa Talisay nagkanayon nga dili gihapon angayang mokompiyansa bisan og gipaubos na sa MGCQ ang siyudad.

Matud ni Gullas nga ilang tumanon ang desisyon sa IATF ug moluwat siya og executive order nga tamdan sa mga Talisaynon.

Buot ni Gullas nga katulo sa usa ka semana na mahimong makakompra diha sa merkado ang mga Talisaynon.

Mohangyo usab siya nga ablihan na ang border sa Bulacao ug mahimo na nga modawat og 75 porsyento nga kapasidad sa kustomer ang mga establisamento.

Si Gullas nihangyo sa tanan nga dili unta isipon nga ang MGCQ nga mahimo na gyud nga buhaton ang tanan sama kaniadto tungod kay pabilin pa gihapon ang pagpatuman sa health protocols.

Si Police Major Gerard Ace Pelare, hepe sa Talisay City Police Station nibutyag nga padayon sila nga mag-monitor sa mga tawo nga badlongon nga dili motuman sa gipatuman nga lagda. — Rowena D. Capistrano, Romeo T. Limpangog, Le Phyllis F. Antojado. Gabriel C. Bonjoc /BDB (BANATNEWS)