400 ka Oponganon nahatagan og trabaho

CEBU, Philippines — Gihangop sa pipila ka molupyo  sa Dakbayan sa Lapu-Lapu kinsa nahatagan og kahigayonan nga makasulod og trabaho diha sa buhatan sa Philippine Statistic Authority (PSA) alang sa pagpahigayon og census nga gikatgakda sa buwan sa Septiyembre niining tuiga.

Si Mayor Junard  Ahong Chan sa post niini sa iyang facebook page niadtong Biyernes nagkanayon nga pipila sa mga molupyo sa dakbayan ang nadawat sa trabaho    sa nahisgutang      ahensiya.

Gibutyag ni Chan nga 400 ka Oponganon ang nadawat isip mga bag-ong kawani sa PSA.

Ang maong mga bag-ong kawani dugang sa ilang mga tawo nga mopahigayon og census.

Matud ni Chan nga sayo pa, ang kadagkoan sa maong ahensiya ang nakigtagbo ngadto sa mga lokal nga opisyal ug nagpahibalo kini kabahin sa dugang nga mga kawani nga ilang gikinahanglan.

“Kapin 400 sa atong kaigsuonang Oponganon ang nahatagan og oportunidad nga makakaplag og panginabuhian pinaagi sa Philippine Statistics Authority Office human kita nakigsabot sa maong ahensiya nga diri sa atong siyudad kuhaon ang manpower”, butyag ni Chan.

Si Chan nagkanayon nga ang bag-ong nadawat nga mga kawani sa PSA maoy tahasan sa pagpatuman sa 2020  nga census diin una unta nga gikatakda niadtong buwan sa Mayo niining tuiga apan tungod sa COVID-19   nauswag  kini ngadto  sa buwan sa  Septiyembre niining tuiga.

Ang maong mga bag-ong kawani gipaubos kini sa orientation kalabutan sa ilang trabaho pagsuroy diha sa kabalayan aron masuta ang gidaghanon sa populasyon. /BDB (BANATNEWS)