Mga tulonghaan sa Mandaue gi-disinfect na

CEBU, Philippines — Ang mga personnel sa City Disaster Risk Reduction Management Office (CDRRMO) nipahigayon na kini og disinfection ug decontamination sa mga publikong tulunghaan nga gihimong isolation unit facility sa Dakbayan sa Mandaue.

Si Felix Suico Jr., hepe  sa CDRRMO sa siyudad nagkanayon nga ilang gihimo ang disinfection ug decontamination sa maong mga publikong tulunghaan aron matugyan na kini ngadto  sa Department of Education (DepEd) nunot sa pagbukas sa klase sa Agosto 24, 2020.

Naglakip sa gibakante na nga gigamit nga isolation center mao ang siyam ka publikong tulunghaan gawas lamang sa tulo nga posible nga magpadayon ang paggamit bisan sa paglapas sa Hulyo 30, 2020 nga kinutoban sa paggamit niini.

Ang mga tulunghaan nga napaubos sa disinfection ug decontamination nahimutang diha sa Barangay Casili, Tawason, Subangdaku ug mosunod usab ang Canduman, Cubacub ug Pagsabungan. /BDB (BANATNEWS)